Kryeministri hungarez i dërgon urime Kurtit, rikonfirmon mbështetjen për sigurinë dhe rrugën evropiane të Kosovës

Kryeministri i Republikës së Kosovës, Albin Kurti, ka pranuar gjatë pasdites së së premtes një letër urimi nga homologu i tij hungarez, Péter Magyar, me rastin e marrjes së mandatit të ri qeverisës. Letra zyrtare i është dorëzuar kreut të ekzekutivit kosovar përmes ambasadorit të Hungarisë në Prishtinë, László István Dux. Në mesazhin e tij urues, shefi i qeverisë hungareze ka vlerësuar lart rëndësinë e vendit tonë për paqen dhe qetësinë rajonale. "Dua t’ju shpreh urimet më të sinqerta për zgjedhjen tuaj Kryeministër i Republikës së Kosovës. Ne njohim rolin kyç të Kosovës në stabilitetin e rajonit të Ballkanit Perëndimor. Andaj, jemi të bindur që një Ballkan Perëndimor prosperues ka rëndësi jetike për Hungarinë dhe mbarë kontinentin evropian", thuhet ndër të tjera në letrën e urimit. Gjatë komunikimit zyrtar, kryeministri Magyar ka ritheksuar gjithashtu gatishmërinë e shtetit të tij për të qëndruar pranë Kosovës në proceset e sigurisë dhe të integrimit euroatlantik. "Në këtë frymë, më lejoni të ritheksoj se Hungaria mbetet e përkushtuar për të kontribuuar për sigurinë e Kosovës nëpërmjet pjesëmarrjes në misionin e KFOR-it dhe për të mbështetur vendin tuaj në rrugën evropiane", ka shtuar më tej kryeministri hungarez.