Lëkundje shkatërruese 7.7 rikter në Panama: Dëme të mëdha materiale, shembje ndërtesash dhe mobilizim shtetëror

Një lëkundje e fuqishme sizmike prej 7.7 shkallësh të Rihterit ka tronditur Panamanë, duke mbjellë panik të madh te popullsia dhe duke shkaktuar dëme të konsiderueshme strukturore. Bazuar në të dhënat zyrtare nga Shërbimi Gjeologjik i Shteteve të Bashkuara (USGS), vala e tërmetit u ndie nga më shumë se 4.6 milionë banorë, ku në disa rajone intensiteti i tij varionte nga mesatar deri në shumë i fortë. Ngjarja sizmike ndodhi të premten në pasdite, pak përpara orës 15:00 sipas orës lokale. Vatrat e lëkundjes u lokalizuan rreth 10 kilometra larg qytetit Pitaloza Arriba, në rajonin jug-qendror të shtetit panamez. Efektet e këtij tërmeti u ndien qartë edhe në kryeqytetin Panama City, i cili ndodhet përafërsisht 200 kilometra larg epiqendrës. Materialet filmike të shpërndara në rrjetet sociale pasqyrojnë skena dramatike, ku shihen objekte të shkatërruara në zonat si Penonomé dhe Soná. Në një nga videot e verifikuara, dëgjohet thirrja e dëshpëruar e një qytetari që kërkon për të mbijetuar të mundshëm nën rrënoja. Po ashtu, në Penonomé janë regjistruar dëmtime serioze në një katedrale historike, ku një pjesë e saj dhe një nga kullat janë shembur plotësisht, ndërsa një godinë hoteli ka pësuar dëme fatale duke u shkatërruar pothuajse tërësisht. Deri në këto momente, fatmirësisht nuk ka të dhëna për persona të humbur apo të lënduar rëndë, ndërsa grupet e emergjencës ndodhen në terren për të bërë vlerësimin e plotë të dëmeve materiale. Për banorët e rajoneve më të prekura, përjetimi ka qenë frikësues. Ricardo Brown, një 74-vjeçar nga provinca Herrera, deklaroi për agjencinë e lajmeve Reuters se lëkundjet dëmtuan mjaft shtëpi në lagjen Las Minas ku ai banon. “Jemi të tmerruar. Këtu jemi vetëm ne të dy, dy pleq. Banesa është çarë tejpërtej dhe kemi frikë se do të na shembet sipër”, ka rrëfyer ai mes ankthit. Ekspertët e gjeologjisë bëjnë me dije se tërmeti ishte me thellësi mjaft të cekët prej vetëm 12 kilometrash, faktor ky që rrit fuqinë shkatërruese në sipërfaqe. Pas tronditjes kryesore, rajoni është përballuar edhe me disa pasgoditje të njëpasnjëshme intensive, çka e ka shtuar pasigurinë te qytetarët. Në Panama City, me mijëra qytetarë braktisën me shpejtësi ndërtesat e larta dhe u strehuan në ambiente të hapura, rrugë e parqe, duke pritur që situata të qetësohej. Dëmet në kryeqytet deri më tani raportohen të jenë më pak serioze, kryesisht me rënien e pjesëve të çative apo fasadave. Kreu i shtetit të Panamasë, José Raúl Mulino, njoftoi se të gjitha strukturat shtetërore dhe shërbimet e emergjencës janë vënë në gatishmëri të plotë për t'u ardhur në ndihmë qytetarëve. Ai bëri apel publik për vetëpërmbajtje dhe qetësi, duke nëvizuar se paniku dhe kaosi duhet të shmangen me çdo kusht. Fillimisht, ngjarja u pasua nga një alarm për cunami i cili përfshinte 11 shtete të rajonit. Sidoqoftë, pas analizave të mëtejshme, Sistemi i Paralajmërimit për Cunami i SHBA-së njoftoi se rreziku i dallgëve shkatërruese oqeanike kishte kaluar tërësisht. Nga ana tjetër, autoritetet zyrtare siguruan se Kanali i Panamasë — një nga arteriet detare më strategjike në botë që lidh Oqeanin Paqësor me atë Atlantik — nuk ka pësuar asnjë dëmtim dhe vazhdon funksionimin normal pa pengesa. Kjo goditje e fuqishme sizmike ndodhi çuditërisht vetëm tri ditë përpara se në Panama të zhvillohej një stërvitje gjithëpërfshirëse kombëtare për evakuimin në rast tërmeti të madh. Veç kësaj, ngjarja pason një seri tërmetesh shkatërruese që trazuan Amerikën Latine, veçanërisht Kolumbinë dhe Venezuelën gjatë muajve të parë të këtij viti.