Amaneti i pazakontë i ikonës së Hollywood-it: Kim Novak dëshiron që trupi i saj të bëhet kompost për të mbjellë pemë

Aktorja me famë botërore e epokës së artë të kinematografisë amerikane, Kim Novak, ka ndarë me publikun një dëshirë të papritur për periudhën pas ndarjes nga jeta. 93-vjeçarja kërkon që trupi i saj t'i nënshtrohet procesit të kompostimit, me qëllim që mbetjet e saj organike të shërbejnë për mbjelljen dhe rritjen e pemëve. Novak ka lënë gjurmë të pashlyeshme në Hollywood gjatë një dekade të suksesshme artistike. Ajo u bë mjaft e njohur kryesisht për rolin e saj ikonik krah aktorit Jimmy Stewart në kryeveprën e Alfred Hitchcock-ut të vitit 1958, “Vertigo”. Përveç këtij filmi klasik, ajo shkëlqeu edhe në rolin e një vajze nga provinca e dashuruar pas personazhit të interpretuar nga William Holden në filmin “Picnic”, një përshtatje kinematografike e dramës së William Inge. Pavarësisht suksesit të madh, gjatë viteve ’60 ajo zgjodhi të tërhiqej nga bota e zhurmshme e ekranit për t’iu përkushtuar pikturës, kujdesit ndaj kafshëve dhe pasioneve personale. Sot, aktorja me origjinë nga Çikago jeton e qetë në një fermë në Oregon. Ajo u ka kërkuar miqve të saj që të respektojnë këtë vullnet të fundit pas vdekjes. Në një prononcim për organizatën për mbrojtjen e kafshëve PETA (People for the Ethical Treatment of Animals), ylli i filmit “Bell, Book and Candle” u shpreh: “E mendoj tani kështu: kur të iki, është në rregull, sepse do të bëhem pjesë e asaj peme të bukur dhe do të vazhdoj të rritem”. Dashuria e saj për natyrën dhe botën shtazore ka qenë gjithmonë e veçantë. Përgjatë jetës, përveç kafshëve më të zakonshme si kuajt, qentë e zogjtë, Novak ka pasur pranë vetes edhe një dhi, si dhe një gjarpër të pagëzuar me emrin Sincerely. Ajo kujton se braktisja e Hollywood-it dhe zhvendosja në një mjedis natyror i mundësoi të jetonte pranë kafshëve dhe të zbulonte identitetin e saj të vërtetë. Sipas saj, artistët shpesh rrezikojnë të tjetërsohen brenda personazheve që interpretojnë, ndërsa jeta e larguar nga kamerat e ndihmoi të kuptojë vlerat thelbësore përmes kafshëve, të cilat nuk e gjykojnë njeriun nga pasuria apo vendbanimi.