Kosova kërkon ndihmën e Budapestit zyrtar për avancimin drejt Bashkimit Evropian

Kryenegociatori i Republikës së Kosovës për dialogun dhe integrimin me Bashkimin Evropian, Jeton Zulfaj, ka zhvilluar një vizitë zyrtare në Budapest, ku është takuar me zyrtarë të lartë të shtetit hungarez për të siguruar mbështetje drejt rrugëtimit evropian të vendit. Gjatë qëndrimit në kryeqytetin hungarez, Zulfaj ka zhvilluar biseda të ndara me zëvendëssekretaren e shtetit për politikë të sigurisë në Ministrinë e Punëve të Jashtme të Hungarisë, Cecília Szenes, si dhe me të dërguarin e posaçëm të këtij shteti për Ballkanin Perëndimor, András Klein. Në qendër të diskutimeve në të dyja takimet ka qenë perspektiva evropiane e Kosovës, duke u fokusuar te marrja e statusit të vendit kandidat dhe nisja e negociatave si prioritetet e radhës. Zulfaj ka vënë në pah se vlerësimi i Kosovës duhet të bëhet mbi baza meritore, duke shtuar se marrja e statusit kandidat dhe hapja e bisedimeve do të shërbejnë si shtytje për reforma të thella që ndikojnë drejtpërdrejt në funksionimin e institucioneve dhe mirëqenien e qytetarëve. Duke e cilësuar Hungarinë si një aktor kyç, kryenegociatori kosovar ka kërkuar angazhimin dhe mbështetjen aktive të Budapestit për të përshpejtuar procesin e integrimit të Kosovës në familjen evropiane. Në takimin e zhvilluar me emisarin Klein, biseda është zgjeruar edhe në fushën e sigurisë rajonale dhe bashkëpunimit dypalësh. Zulfaj ka theksuar se Prishtina mbetet një aleat i besueshëm për paqen dhe stabilitetin në rajon, duke shtuar se përfshirja e Kosovës në strukturat e NATO-s dhe të Bashkimit Evropian përfaqëson një garanci për sigurinë afatgjatë të gjithë zonës. Në fund, kryenegociatori ka shprehur mirëseardhjen për përfshirjen e Hungarisë në grupin “Miqtë e Ballkanit Perëndimor” në korrik të këtij viti, duke e cilësuar këtë hap si dëshmi të qartë të vëmendjes dhe angazhimit të shtuar hungarez ndaj zhvillimeve në rajon.