Hapi i radhës drejt BE-së: Shqipëria mbyll me sukses kapitullin e katërt të negociatave

Kryeministri Edi Rama ka ndarë me qytetarët një tjetër zhvillim pozitiv lidhur me rrugëtimin e Shqipërisë drejt anëtarësimit në Bashkimin Evropian, duke konfirmuar ecurinë pozitive të bisedimeve për integrim. Përmes një mesazhi të shpërndarë në platformat sociale, kreu i ekzekutivit ka bërë të ditur përmbylljen me sukses të një tjetër kapitulli të rëndësishëm në këtë proces, duke theksuar se ky zhvillim do të shërbejë si një shtysë e fuqishme për rritjen e investimeve, zgjerimin e tregut të punës dhe rritjen e konkurrueshmërisë në vend. "Shqipëria mbyll kapitullin e katërt, nis numërimi mprapsht i kohës drejt objektivit historik. Drita jeshile nga BE për mbylljen e negociatave të Kapitullit 20 forcon perspektivën për investime, inovacion, konkurrueshmëri dhe punësim", ka shkruar Rama në reagimin e tij.