Tragjedia në Gjilan, Vjosa Osmani: Gratë nuk duhet të humbin jetën që institucionet të reagojnë

Një ngjarje e rëndë ka tronditur pasditen e sotme fshatin Livoç i Ulët në Gjilan, ku si pasojë e një krimi kanë mbetur të vrarë dy persona, konkretisht një vëlla e motër rreth moshës 30-vjeçare. Lidhur me këtë ngjarje tragjike ka reaguar menjëherë ish-presidentja e Kosovës, Vjosa Osmani, e cila ka shprehur indinjatën e saj të thellë përmes një postimi në rrjetin social Facebook. Osmani ka theksuar se një shoqëri që shpreh dhimbje vetëm pas çdo krimi, pa arritur të parandalojë dhunën në kohë, duhet domosdoshmërisht të mbajë përgjegjësi, duke shtuar se një grua e re dhe vëllai i saj u privuan nga jeta nga bashkëshorti i viktimës. "Asnjë fjalë nuk mjafton për ta përshkruar këtë tmerr. Gratë nuk duhet të vdesin që institucionet të zgjohen. Kërcënimet nuk duhet të përfundojnë në arkiv, e dhuna nuk duhet të përfundojë në varreza. Drejtësi për viktimat. Përgjegjësi për çdo dështim. Veprim, jo fjalë. Asnjë jetë më pak! Asnjë justifikim më shumë!", ka shkruar ajo.