Zgjedhjet e reja në horizont, Besnik Tahiri: Aleanca është e gatshme t'i hyjë këtij procesi

Nënkryetari i Aleancës për Ardhmërinë e Kosovës (AAK), Besnik Tahiri, ka deklaruar se kryeministri i vendit dhe kryetari i Lëvizjes Vetëvendosje, Albin Kurti, ka munguar vullnetin e nevojshëm për të arritur një marrëveshje konsensuale rreth zgjedhjes së presidentit të ri. Gjatë një interviste televizive, Tahiri theksoi se subjekti i tij politik nuk sheh arsye për takime me kreun e ekzekutivit, duke kujtuar se ende nuk kanë marrë një pëjrgjigje zyrtare për gjashtë kushtet e dorëzuara më parë, në të cilat përfshihet edhe projekti i gazit amerikan. Sipas tij, i gjithë ky zhvillim rreth postit presidencial shërben vetëm për konsum publik dhe për t'i ikur një zgjidhjeje reale. Duke folur për mundësinë e një kandidature të përbashkët nga opozita, pas zhvillimeve të fundit dhe vendimeve të Gjykatës Speciale ndaj ish-krerëve të UÇK-së, Tahiri vlerësoi se kjo mbetet në dorën e partive opozitare për të vlerësuar se çfarë udhëheqësi i duhet shtetit. Megjithatë, ai përsëriti bindjen se kreu i AAK-së, Ramush Haradinaj, përfaqëson profilin e duhur presidencial për Kosovën dhe gjithë Ballkanin Perëndimor. Sipas Kushtetutës, vendi ka afat deri më 6 tetor për të përmbyllur çështjen e kreut të shtetit, ndërsa në rast dështimi, zgjedhjet e jashtëzakonshme parlamentare pritet të mbahen më së largu deri më 15 nëntor. Në këtë linjë, Tahiri u shpreh se AAK-ja është plotësisht e përgatitur për një skenar të tillë elektoral, duke besuar në fuqinë dhe mbështetjen e elektoratit të saj.