ZRRE lë anash furnizuesit privatë në agjendën e re, fokusi te KEK-u për prodhimin e energjisë

Zyra e Rregullatorit për Energji (ZRRE) ka përcaktuar rendin e ditës për mbledhjen e ardhshme të Bordit të ri, e cila do të jetë seanca e dhjetë për vitin 2026. Në këtë agjendë, ndërkohë që janë futur aplikacionet e Korporatës Energjetike të Kosovës (KEK) për prodhimin e rrymës nga Termocentralet Kosova A dhe Kosova B, mungojnë kompanitë private të furnizimit, licencat e të cilave kanë skaduar që nga muaji shtator. Sipas dokumentit zyrtar të publikuar, mbledhja është caktuar të mbahet më 9 tetor 2026, duke filluar nga ora 14:00. Përveç shqyrtimit të kërkesave të KEK-ut, fokusi i kësaj seance do të jetë edhe te trajtimi i aplikacioneve të shumta për autorizime të vetë-konsumit, të paraqitura si nga bizneset ashtu edhe nga persona fizikë. Megjithatë, bie në sy fakti se në këtë listë shqyrtimi nuk është përfshirë asnjë pikë që u adresohet licencave të skaduara të furnizuesve privatë të energjisë, duke lënë pa një epilog institucional statusin e tyre aktual. Lidhur me këtë situatë, janë dërguar pyetje zyrtare në drejtim të ZRRE-së për të kuptuar arsyet pse është dhënë përparësi aplikacioneve të KEK-ut në dëm të atyre të prodhuesve privatë, të cilët ndodhen me licenca të skaduara. Njëkohësisht, redaksia ka kërkuar sqarime edhe rreth numrit të saktë të operatorëve privatë që po presin shqyrtimin e vazhdimit të licencave, si dhe mbi transparencën nëse po aplikohen standarde të njëjta ligjore dhe procedurale për të gjithë akterët e tregut, por deri në orët e publikimit të këtij materiali nuk ka pasur ndonjë përgjigje zyrtare.