Skandal korrupsioni në Vjenë: Në shënjestër të drejtësisë dy ish-zyrtarë me origjinë shqiptare

Një rast i bujshëm korrupsioni ka tronditur Zyrën e Emigracionit dhe Shtetësisë në Vjenë, e njohur si MA 35, ku në qendër të hetimeve paraprake ndodhen dy ish-punonjës me prejardhje shqiptare. Ata dyshohen se kanë negociuar përfitime financiare në këmbim të kalimit më të shpejtë të procedurave zyrtare. Autoritetet hetimore kanë sekuestruar pajisjet telefonike të dy të dyshuarve, ku thuhet se janë zbuluar mijëra mesazhe të shkëmbyera në aplikacionin Telegram. Këto biseda po kalojnë në filtër për të kuptuar nëse vendimmarrjet për lejet e qëndrimit, vizat dhe proceset e tjera janë manipuluar në mënyrë abuzive. Në një prej bisedave të bëra publike lidhur me një kërkesë për vizë, ku theksohej dëshira e fortë e një aplikanteje për ta fituar atë, është përmendur shuma prej 1.000 eurosh si kompensim i mundshëm. Ndërkaq, në fragmente të tjera të komunikimit flitet për ndarjen e përfitimeve financiare në raportin 50 me 50 mes palëve. Përveç çështjeve të emigracionit, hetuesit po analizojnë edhe disa biseda që përfshijnë procedura ndërtimi, çka lë të kuptohet se skandali mund të ketë një shtrirje më të gjerë se sa mendohej fillimisht në institucione. Njëri nga të dyshuarit, i cili ka mbajtur pozicionin e ish-drejtuesit të një sektori, ka kaluar një periudhë në paraburgim për shkak të frikës së prishjes së provave, por më pas është lënë i lirë. Nën hetim është vendosur edhe ish-eprorja e tij, e cila gjithashtu nuk është më pjesë e këtij institucioni. Ndaj ish-zyrtarit lartë rëndojnë akuzat për shpërdorim detyre dhe korrupsion, ndërsa ish-kolegia e jo po hetohet për marrje të mundshme të përfitimeve të kundërligjshme. Pavarësisht këtyre zhvillimeve, për të dy personat vazhdon të vlejë prezumimi i pafajësisë deri në një vendim të formës së prerë nga organet e drejtësisë. Drejtoria e MA 35 ka shprehur gatishmërinë për bashkëpunim të ngushtë me autoritetet për zbardhjen e plotë të ngjarjes, ndërkohë që paralajmërohet rishikimi i një numri dosjesh që mund të kenë kaluar përmes duarve të tyre. Megjithatë, autoritetet theksojnë se ende nuk ka prova përfundimtare se të gjitha aplikimet e trajtuara nga personat në fjalë janë ndikuar në mënyrë të paligjshme, apo se pagesat e përmendura në mesazhe janë finalizuar realisht. Ky rast ka marrë një vëmendje të veçantë edhe për shkak të ndikimit tek komuniteti shqiptar dhe qytetarët e huaj në Austri, duke qenë se MA 35 mbetet institucioni kyç për rregullimin e statusit ligjor, vizave dhe shtetësisë në kryeqytetin austriak.