Tragjedia e Laurent Krasniqit: I akuzuari Shemsi Llugaliu nuk deklarohet për fajësinë në seancën fillestare

Ka nisur gjykimi për aksidentin e rëndë trafikut që i mori jetën 29-vjeçarit Laurent Krasniqi. Gjatë seancës fillestare të mbajtur këtë të hëne, i akuzuari Shemsi Llugaliu është deklaruar se nuk është në gjendje të shprehet lidhur me fajësinë e tij, veprim ky që pasoi leximin e aktakuzës nga ana e prokurorit Malart Kuçi. Seanca, e cila u hap në orën 10:00, po drejtohet nga gjyqtari Bujar Ahmeti. Në nisje të shqyrtimit gjyqësor, mbrojtësi i të pandehurit, avokati Naim Rudari, kërkoi shtyrjen e procedurës me arsyetimin se është angazhuar një ekspert i ri për të përpiluar një super-ekspertizë të re të komunikacionit, duke kërkuar që deklarimi të jepet pasi ajo të jetë gati. Kjo kërkesë u kundërshtua ashpër nga prokurori Kuçi, i cili theksoi se në dosje ekziston tashmë një ekspertizë valide e trafikut që përcakton në mënyrë të qartë rrethanat dhe veprimet e shkaktuesit të aksidentit. Trupi gjykues mori vendim për të rrëzuar kërkesën e mbrojtjes për shtyrje, duke argumentuar se bëhet fjalë për një seancë fillestare, fazë në të cilën dispozitat ligjore e obligojnë të pandehurin që të deklarohet qartësisht për akuzën e ngritur ndaj tij, qoftë duke pranuar apo mohuar fajësinë. Kujtojmë se viktimë e këtij aksidenti tragjik të ndodhur mbrëmjen e 2 shtatorit mbeti 29-vjeçari Laurent Krasniqi, i njohur gjerësisht për publikun përmes projekteve publicitare dhe skeçeve humoristike në rrjetet sociale. Në këtë proces gjyqësor, familjen e dëmtuar dhe interesat e tyre ligjore po i përfaqëson avokati Fanol Krasniqi.