Alarmi për Kylian Mbappe: Sulmuesi francez pëson sërish dëmtim në gjurin e majtë

Kylian Mbappe po përballet sërish me probleme fizike, pasi një gol i shënuar i ka kushtuar shtrenjtë, duke e lënë të dëmtuar në gjurin e majtë – i cili ishte kthyer në shqetësimin kryesor gjatë edicionit të kaluar. Ky zhvillim ka vënë në gatishmëri stafin teknik të Kombëtares së Francës dhe atë të Real Madridit. Drejtuesit dhe mjekët e klubit madrilen janë veçanërisht të shqetësuar, duke kujtuar komplikimet e vitit të shkuar me të njëjtin gju, një periudhë e cila u shoqërua me debate të ashpra rreth diagnozës mjekësore dhe kohëzgjatjes së rikuperimit. Si pasojë e kësaj situate, sulmuesi ka lënë menjëherë grumbullimin e Përfaqësueses së Francës dhe është nisur drejt Madridit për të nisur menjëherë procesin e rehabilitimit. Në kampin spanjoll synojnë ta kenë yllin e tyre në dispozicion sa më parë, sidomos duke pasur parasysh kalendarin delikat dhe sfidën e madhe kundër Barcelonës në “El Clasico”, e cila do të luhet pas një muaji dhe ku pritet prania e tij në formën optimale. Për këtë arsye, rikuperimi i plotë dhe i shpejtë i francezit mbetet prioriteti absolut i klubit për javët e ardhshme.