Inteligjenca artificiale në Kosovë: 45% e qytetarëve përdorin ChatGPT, mbizotërojnë pyetjet private

Përdorimi i platformës së njohur të inteligjencës artificiale, ChatGPT, në Kosovë ka regjistruar shifra mjaft të larta, duke lënë pas mesataren e vendeve të Bashkimit Evropian. Këto të dhëna janë bërë publike nga profesori dhe studiuesi Dominik Kanbach gjatë punimeve të konferencës PRIME, e cila u mbajt me titullin “Two Steps Forward and No Stepping Back” dhe u fokusua te sipërmarrja strategjike si motor i transformimit të dyfishtë. Sipas tij, këto tregues dëshmojnë se shoqëria kosovare po ecën me hapa të sigurt drejt së ardhmes. Duke e vlerësuar këtë situatë si një zhvillim tejet pozitiv, Kanbach ka shtjelluar statistikat e përdorimit gjatë fjalës së tij. “Në Bashkimin Evropian, rreth një e treta e popullsisë e përdor rregullisht inteligjencën artificiale. Në Kosovë, statistikat e fundit tregojnë një shifër prej afër 45 për qind, e cila është dukshëm mbi mesataren e BE-së. Për dikë kjo mund të duket befasi, por unë e shoh si një tregues të qartë se sa e orientuar nga e ardhmja dhe teknologjia është Kosova. Padyshim, kjo lidhet edhe me faktin se kemi të doje me një popullsi të re, gjë që përbën një aset të çmuar”, u shpreh Kanbach. Më tej, studiuesi ka vënë në dukje se teknologjia e AI nuk po shfrytëzohet vetëm për nevoja profesionale, por ka depërtuar thellë edhe në jetën e përditshme të qytetarëve. Në bazë të hulumtimeve, rreth 73% e pyetjeve dhe kërkesave që i drejtohen ChatGPT-së kanë karakter personal, duke përfshirë këtu kërkesa për orientim hapësinor, udhëzime blerjesh, konsultime mjekësore apo edhe këshilla të ndryshme jetësore. “Shtatëdhjetë e tre për qind e gjërave që njerëzit e pyesin ChatGPT-në janë private, si për shembull: si të shkoj në një vend të caktuar, ku mund të blej diçka, pyetje mjekësore apo kërkesa për këshilla. Bëhet fjalë për tre të katërtat e totalit, që është një përqindje shumë e lartë”, shtoi ai. Kjo dinamikë, sipas Kanbach, dëshmon gjithashtu se ekziston ende një hapësirë e jashtëzakonshme për të shfrytëzuar potencialin e plotë profesional të inteligjencës artificiale. Duke u ndalur te kronologjia e këtij fenomeni, ai kujtoi vitin 2023 si pikën e kthesës kur nisi hovi i madh i interesimit për ChatGPT, duke theksuar se mjetet e AI kanë lehtësuar ndjeshëm qasjen në burime dhe ekspertizë të ndryshme. Gjatë prezantimit të tij, eksperti gjithashtu u fokusua te sfidat dhe tendencat aktuale të transformimit digjital, duke evidentuar peshën në rritje që ka teknologjia e avancuar në këtë proces. “Në vijim do të ndalemi te një aspekt specifik i transformimit digjital, i cili – siç e vumë re edhe gjatë diskutimeve në panel – aktualisht po dominohet fuqishëm nga inteligjenca artificiale”, tha Kanbach. Ai theksoi se synimi i kumtesës së tij ishte nxitja e reflektimit mbi sipërmarrjen strategjike dhe ndërlidhja e saj me ndryshimet e fundit që po e riformësojnë botën e transformimit të dyfishtë. “Dua të flas për sipërmarrjen strategjike si shtytëse të këtij transformimi të dyfishtë. Duke parë moton e konferencës dhe tematikat e trajtuara, vendosa të mos kufizohem vetëm në një projekt të vetëm kërkimor, por të jap një vështrim të gjerë mbi zhvillimet aktuale që po diktojnë ndryshimet në botën e biznesit”, u shpreh ai. Në mbyllje të fjalës së tij, Kanbach trajtoi ndërlidhjen mes strategjisë dhe sipërmarrjes, duke argumentuar se këto koncepte duhet të analizohen në mënyrë të integruar përballë sfidave bashkëkohore teknologjike dhe ekonomike.