Tragjedi në Gjermani: Vriten dy zyrtarë gjatë kontrollit të armëve, arrestohet 60-vjeçari pas operacionit dramatik

Një ngjarje e rëndë ka tronditur qytezën Berngau në rajonin e Palatinatit të Epërm në Gjermani, ku dy punonjës të Zyrës së Qarkut Neumarkt kanë humbur jetën tragjikisht si pasojë e të shtënave me armë zjarri. Policia gjermane ka arritur të vërë në pranga autorin e dyshuar të këtij krimi të dyfishtë. I dyshuari, një 60-vjeçar, dyshohet se ka ekzekutuar një punonjës dhe një punonjëse gjatë një kontrolli rutinë që kishte të bënte me armët e zjarrit. Incidenti fatal ndodhi të enjten, rreth orës 14:00, pasi banorë lokalë njoftuan autoritetet për të shtëna armësh, duke detyruar policinë t'u bëjë thirrje qytetarëve që të qëndrojnë të mbyllur në shtëpi. Pas sulmit, autori u ngujua brenda një banese, ndërsa forcat speciale e rrethuan zonën duke u përpjekur për një zgjidhje paqësore përmes negociatave, të cilat fatkeqësisht dështuan. Pas orësh të tëra tensioni, rreth orës 02:20 të mëngjesit, forcat e rendit ndërhynë me forcë duke përdorur lëndë shpërthyese për të hyrë në ndërtesë. Gjatë aksionit të ndërhyrjes, i dyshuari mbeti i plagosur lehtë në këmbë nga një plumb dhe u dërgua menjëherë nën kujdesin mjekësor, konfirmuan burimet zyrtare të policisë. Kryetari i komunës së Berngaut, Thomas Meier, në një deklaratë për mediat vendase, u shpreh se komuniteti me rreth 2.600 banorë po përpiqet ta përballojë këtë situatë tronditëse me gjakftohtësi, duke treguar një solidaritet të lartë përmes rrjeteve sociale dhe grupeve të komunikimit. Si pasojë e kësaj tragjedie, të gjitha aktivitetet publike në komunitet, përfshirë seancat stërvitore dhe mbledhjet e ndryshme të shoqatave lokale, janë anuluar deri në një njoftim të dytë.