"Mbyllja e një cikli të ndritur" / Sylvinho zbardh prapaskenat e largimit nga Shqipëria dhe raportin me Armand Dukën

Ish-timonieri i Kombëtares shqiptare, Sylvinho, ka sqaruar së fundmi arsyet që çuan në përfundimin e bashkëpunimit me Federatën Shqiptare të Futbollit (FSHF) në maj të vitit 2026. Tekniku brazilian e ka konsideruar këtë vendim si një përmbyllje të natyrshme të një cikli të suksesshëm për të dyja palët. Në një intervistë për Flashscore, trajneri brazilian zbuloi se ky vendim ishte diskutuar paraprakisht dhe me pëlqim të dyanshëm me kreun e FSHF-së, Armand Duka. Sipas tij, palët kishin rënë dakord se bashkëpunimi kishte arritur në pikën e tij maksimale. "E kishim biseduar paraprakisht këtë çështje me presidentin dhe ndamë mendimin se ky ishte fundi i një cikli. Federata pati një rritje të jashtëzakonshme, po ashtu edhe ne u rritëm profesionalisht. Erdhi një moment kur të dyja palët e kuptuam se nuk kishim se çfarë t'i shtonim më shumë këtij rrugëtimi", u shpreh Sylvinho. Ish-përzgjedhësi kuqezi nuk i kurseu vlerësimet maksimale për kreun e futbollit shqiptar, duke vënë në dukje se Duka e vlerësonte lart dhe e njihte në detaje punën e palodhshme të stafit teknik përgjatë gjithë kohës. "Presidenti Armand Duka është një lider tejet inteligjent. Kemi pasur një mirëkuptim të shkëlqyer të dyanshëm dhe ai ishte plotësisht i vetëdijshëm për përkushtimin dhe punën tonë të përditshme e intensive", shtoi tekniku brazilian. Për të treguar harmoninë dhe frymën e bashkëpunimit që ekzistonte brenda FSHF-së, Sylvinho ndau edhe një kujtim të veçantë nga periudha kur drejtonte kuqezinjtë, duke sjellë në vëmendje një fundjavë kur Duka kishte kërkuar praninë e stafit për një konsultë urgjente. "I thamë: 'Por ne nuk punojmë të shtunave'. Ai m'u përgjigj: 'E di, por më duhen katër persona këtu për të diskutuar'. Kështu që mblidheshim rreth tryezës dhe të gjithë vinin me dëshirë të madhe. Punonim edhe katër orë të tjera pa asnjë problem. Gjithmonë ka funksionuar në këtë mënyrë", tregoi ai. Në mbyllje, ish-trajneri i Shqipërisë e cilësoi përvojën e tij me FSHF-në si një histori tejet të bukur, duke sqaruar se ndarja nuk erdhi për shkak të ndonjë mosmarrëveshjeje apo konflikti, por thjesht si një përfundim logjik i një rrugëtimi që kishte dhënë maksimumin e mundshëm. "Ky ishte raporti që kishim ndërtuar. Ishte një marrëdhënie e mrekullueshme dhe, në fund të fundit, thjesht shënoi përfundimin e një cikli për të dyja palët", përfundoi Sylvinho.