Naser Arifi largon portretin e Vjosa Osmanit nga Ministria e Drejtësisë: E hoqa pasi i shkeli parimet

Naser Arifi, këshilltar politik i ministres së Drejtësisë, Donika Gërvalla, ka ndërmarrë një veprim simbolik duke larguar fotografinë e presidentes Vjosa Osmani nga ambientet e kësaj ministrie. Ky vendim vjen në një moment të ri politik, pas zgjedhjes së Justina Shiroka-Pulës në postin e kreut të shtetit. Lajmin për këtë zhvillim e ka bërë të ditur vetë Arifi përmes një postimi në rrjetet sociale, ku ka bashkëngjitur edhe pamjet vizuale të momentit të heqjes së fotografisë nga muri. Në shpjegimin e tij, Arifi ka deklaruar: “Vet e kam vënë kur ka përfaqësuar parime, vet po e heq tani që i ka shkelur ato”. Kujtojmë se Naser Arifi nuk është një figurë e panjohur për publikun. Ai u bë i njohur më herët në opinionin publik edhe për angazhimin e tij në transportimin fizik të dosjes së Projektligjit për Byronë e Konfiskimit të Pasurisë nga Ministria e Drejtësisë drejt zyrës së kryeministrit Albin Kurti. Ndryshe, çështja e vendosjes së fotografisë së Presidentit në institucionet shtetërore në Kosovë është e përcaktuar qartë përmes dispozitave ligjore në fuqi.