Këshilli Prokurorial zbardh arsyet e shkarkimit të Blerim Isufajt nga posti i Kryeprokurorit Special

Këshilli Prokurorial i Kosovës (KPK) ka bërë publike vendimin zyrtar dhe argumentet ligjore që çuan në shkarkimin e Blerim Isufajt nga detyra e Kryeprokurorit të Prokurorisë Speciale, vendim ky i marrë më 2 tetor. Në dokumentin e publikuar nga organi më i lartë i sistemit prokurorial, theksohet se largimi i Isufajt është pasojë e disa gjetjeve serioze. Ndër shkaqet kryesore të renditura në vendim janë keqmenaxhimi i Prokurorisë Speciale, shfaqja e jokompetencës në ushtrimin e funksionit udhëheqës, si dhe dështimi i vazhdueshëm në përmbushjen e detyrave që ndërlidhen me këtë pozitë të lartë. Po ashtu, në arsyetim citohet mospërmbushja e standardeve të performancës, e cila është konfirmuar përmes një vlerësimi zyrtar të kryer në përputhje me legjislacionin në fuqi. Sipas KPK-së, këto rrethana, të vlerësuara secila më vete, përbëjnë bazë të mjaftueshme për shkarkim, mbështetur në dispozitat e Ligjit për Këshillin Prokurorial të Kosovës. Kujtojmë se figura e Blerim Isufajt ka qenë në qendër të vëmendjes publike edhe më herët, kur procesi i dekretimit të tij për pozitën e Kryeprokurorit të Shtetit nuk u finalizua nga Presidentja e vendit, Vjosa Osmani.