Tragjedia e 16-vjeçarit shqiptar: Bashkia e Kavalës mbyll 11 fusha futbolli dhe nis inspektimet e sigurisë

Ngjarja e rëndë që i mori jetën 16-vjeçarit shqiptar Asllan Gjana, i njohur ndryshe me nofkën “Ani”, ka shtyrë autoritetet në Greqi të ndërmarrin hapa urgjentë. Bashkia e Kavalës ka marrë vendimin drastik për të mbyllur pa afat 11 fusha futbolli në territorin e saj, duke pezulluar gjithashtu të gjitha lejet për stërvitje dhe aktivitete sportive. Ky vendim vjen vetëm pak ditë pas aksidentit fatal që ndodhi në fushën e Panagias në Thasos, ku i riu shqiptar pësoi dëmtime fatale gjatë një ndeshjeje. Sipas njoftimit zyrtar, të gjitha fushat e mbyllura do t'i nënshtrohen një procesi të menjëhershëm verifikimi për të kontrolluar infrastrukturën dhe kushtet e sigurisë, me vëmendje të veçantë te hapësira mes vijave kufizuese të fushës dhe mureve, tribunave apo strukturave të tjera të ngurta. Dokumenti zyrtar mban firmën e nënkryetarit të Bashkisë së Kavalës për Kulturën, Sportin dhe Rininë, Christos Bosbotis. Qëllimi i autoriteteve lokale është të sigurohen se këto mjedise përmbushin kriteret e vendosura nga Federata Greke e Futbollit dhe garantojnë mbrojtjen e fëmijëve gjatë aktiviteteve fizike. Lejet e përkohshme që ishin lëshuar gjatë gjysmës së dytë të shtatorit janë anuluar deri në përfundimin e inspektimeve dhe realizimin e përmirësimeve të nevojshme infrastrukturore. Nëse gjatë kontrolleve vërehen parregullsi apo mospërputhje me standardet, fushat nuk do të rihapen pa marrë më parë dritën jeshile nga Federata Greke e Futbollit. Për këtë vendim janë njoftuar zyrtarisht edhe Policia e Shtetit dhe Sekretariati i Përgjithshëm i Sportit. Asllan Gjana u përfshi në një aksident tragjik gjatë minutave të para të një takimi futbollistik mes skuadrës së tij dhe Aiantas Panagias Prinou, në fushën e Panagias në Thasos. Ndërsa po përpiqej të kapte topin afër vijës anësore, 16-vjeçari u përplas fuqishëm me pjesën e pasme të kokës në një mur të vendosur pranë tribunave. Pas aksidentit, ai u transportua me urgjencë drejt Spitalit të Përgjithshëm të Kavalas, ku u shtrua në gjendje kritike në repartin e terapisë intensive për shkak të plagëve të rënda në kokë. Pavarësisht ndërhyrjes së mjekëve dhe përpjekjeve maksimale për ta shpëtuar, adoleshenti ndërroi jetë pas dy ditësh lufte me vdekjen. Humbja e tij e parakohshme ka tronditur thellësisht komunitetin vendas, duke sjellë në vëmendje nevojën urgjente për standarde më të larta sigurie në hapësirat sportive ku aktivizohen të rinjtë.