Rruga evropiane e Shqipërisë, komisioneri McGrath pas takimit me Ramën: E ardhmja juaj është në BE

Shqipëria konsiderohet një prej shteteve lider në rrugëtimin drejt integrimit evropian, sipas zyrtarëve të lartë të Bashkimit Evropian. Kështu është shprehur komisioneri evropian për Demokracinë, Drejtësinë, Sundimin e Ligjit dhe Konsumatorët, Michael McGrath, pas bisedës së zhvilluar me kryeministrin Edi Rama. Përmes një postimi në rrjetet sociale menjëherë pas takimit, McGrath ka ritheksuar se perspektiva e vendit tonë është e qartë brenda familjes evropiane, pavarësisht se puna dhe sfidat përpara mbeten ende të rëndësishme. “Shqipëria e ka vendin në BE dhe është një nga vendet pararendëse në procesin e anëtarësimit në BE”, ka theksuar ndër të tjera komisioneri evropian, duke garantuar se Brukseli do të mbetet krah vendit tonë në çdo fazë të këtij udhëtimi. Gjatë bisedës mes dy zyrtarëve, në qendër të vëmendjes kanë qenë arritjet e deritanishme të vendit në fushën e drejtësisë dhe respektimit të ligjit. McGrath i ka cilësuar këto reforma si themelin dhe “spirancën politike” të gjithë këtij procesi transformues. Në fund të prononcimit të tij, përfaqësuesi i lartë i BE-së ka dhënë një vlerësim pozitiv për angazhimin e derisotëm të ekzekutivit shqiptar. “Ka një historik të fortë progresi dhe një ambicie të qartë. Tani, ky ritëm duhet të ruhet për të dhënë rezultate të qëndrueshme dhe të pakthyeshme”, ka përmbyllur ai.