Afrim historik: Sir Alex Ferguson 'thyen akullin' me Roy Keanen pas dy dekadash

Sir Alex Ferguson dhe Roy Keane kanë qenë arkitektët e disa prej kapitujve më të lavdishëm në historinë e Manchester United, por bashkëpunimi i tyre u ndërpre në mënyrë të befasishme në vitin 2005, pas një konflikti që shënoi fundin e epokës së mesfushorit irlandez në “Old Trafford”. Që nga ai moment, marrëdhëniet mes tyre mbetën të ngrira, me kontakte minimale mes dy legjendave të klubit anglez. Megjithatë, pas më shumë se 20 vitesh, trajneri legjendar skocez ka bërë një gjest pajtues përmes librit të tij më të ri, “Games of My Life”. Në këtë botim, Ferguson ka zgjedhur të nderojë kontributin e Keanes, duke vlerësuar me fjalë tejet admiruese një nga paraqitjet më mbresëlënëse të tij në fanellën e “Djajve të Kuq”. Kriza mes dyshes nisi në verën e vitit 2005, gjatë një faze përgatitore në Portugali. Një debat i ashpër për organizimin e kampit stërvitor, i cili ndodhi në sy të lojtarëve të tjerë, shërbeu si shkëndija e parë e përçarjes. Ndonëse fillimisht Ferguson u përpoq ta relativizonte si një përplasje mes dy karaktereve të forta, tensioni u përshkallëzua shpejt. Situata u rëndua pas intervistës së Keanes për MUTV, ku ai kritikoi ashpër shokët e skuadrës pas një disfate ndaj Middlesbrough. Ferguson e konsideroi këtë veprim si shkelje të rëndë disiplinore, duke çuar në ndërprerjen e kontratës së kapitenit në nëntor të vitit 2005. Ky ishte një fund dramatik për liderin që kishte udhëhequr United drejt sukseseve të mëdha për 12 vite radhazi. Sipas publikimeve të fundit, Ferguson e ka veçuar ndeshjen e kthimit të gjysmëfinales së Ligës së Kampionëve në vitin 1999 kundër Juventusit si një moment kyç në librin e tij. Në Torino, United përmbysi rezultatin nga 2-0 në 3-2, duke prerë biletën për në finalen e Barcelonës. Keane, pavarësisht se e dinte se kartoni i verdhë do ta linte jashtë finales, shkëlqeu me një performancë prej lideri, duke shënuar edhe golin e fitores. Duke reflektuar mbi atë mbrëmje, Ferguson shkroi: “E di që Roy nuk kërkon vëmendje dhe as nuk interesohet për lëvdatat, por ai dha gjithçka. Ishte nata e tij më e madhe me fanellën e kuqe. Performanca e tij mes atmosferës së zjarrtë në ‘Stadio Delle Alpi’ do të mbetet përgjithmonë e gdhendur në kujtesën time dhe meriton të përcillet brez pas brezi”.