Prapaskenat e merkatos: Mauro Icardi bëri sakrificë ekstreme për t'u rikthyer te zikaltrit

Pasi skadoi kontrata e tij me Galatasaray-in gjatë muajit qershor, sulmuesi Mauro Icardi vazhdon të jetë në kërkim të një skuadre të re për të vijuar karrierën si lojtar i lirë. Megjithatë, së fundmi kanë dalë në dritë detaje të reja dhe mjaft interesante nga merkatoja e verës, të zbuluara nga gazetari i njohur Fabrizio Biasin. Sipas këtij të fundit, lojtari argjentinas ka tentuar me çdo kusht që të vishet sërish kuqezi, duke kërkuar një rikthim sensacional te Interi, ku do të pranonte rolin e sulmuesit të pestë në skuadër dhe pa pasur asnjë lloj kërkesë financiare për pagën. Duke folur në podkastin “The Table”, Biasin u shpreh se perceptimi publik për largimin e tij të mëparshëm ka qenë shpesh i shtrembëruar, duke theksuar se Icardi i ka kuptuar gabimet e së kaluarës dhe sot do të vepronte ndryshe. “Mendoj se narrativa rreth largimit të tij ka qenë e gabuar: ai pagoi çmimin për një sërë vendimesh për të cilat mban përgjegjësi dhe gjërat shkuan keq për shkak të tij. Sot, ai do të bënte zgjedhje të ndryshme”, u shpreh gazetari. Ai shtoi gjithashtu: “Por unë e kam njohur dhe mund t’ju them se rrallë kam parë një sulmues kaq të lidhur me fanellën e Interit. Dhe këtë nuk e dini: në verën e vitit 2026 ai luftoi me çdo kusht për t’u rikthyer si sulmuesi i pestë i Interit.” Pavarësisht vullnetit të plotë të lojtarit për t'u rikthyer edhe vetëm me përfitimin e pagës bazë, lëvizja nuk u konkretizua dot për shkak se organikës së klubit milanez nuk i duheshin më lojtarë të tjerë në atë repart.