Prona e radhës prej miliona eurosh: Cristiano Ronaldo dhe Georgina blejnë dy vila ekskluzive në një ishull të izoluar

Ylli portugez i futbollit, Cristiano Ronaldo, së bashku me partneren e tij Georgina Rodríguez, kanë pasuruar portofolin e tyre të pasurive të paluajtshme duke blerë dy vila luksoze në një ishull të paprekur në Detin e Kuq. Këto rezidenca të reja ndodhen brenda kompleksit prestigjioz Nujuma, pjesë e Ritz-Carlton Reserve në Arabinë Saudite, një zonë e dizajnuar enkas për t'i siguruar çiftit konfidencialitet maksimal larg vëmendjes mediatike. Ajo që e bën këtë destinacion edhe më unik është fakti se në këtë ishull, i cili shtrihet rreth 26 kilometra larg kontinentit, nuk mund të udhëtohet me automjet. Qasja e vetme realizohet ekskluzivisht përmes anijeve ose hidroplanëve me qira. Blerja përfshin dy struktura me përmasa të ndryshme: vilën më të madhe me tre dhoma gjumi, e cila është përshtatur për jetesën familjare me fëmijët, si dhe një tjetër më të vogël me dy dhoma gjumi, e ideuar për momente më intime në çift. Vilat janë ngritur në një nga pikat më elitare turistike të Arabisë Saudite, të rrethuara nga rëra e bardhë dhe ujërat e pastra kristalore. Kompleksi Nujuma përfshin gjithsej vetëm 19 rezidenca private, duke u garantuar pronarëve shërbime të klasit të lartë dhe qetësi absolute. Megjithëse kompania investitore nuk ka publikuar shifrën zyrtare, vlera e këtij investimi të fundit vlerësohet të kalojë shifrën e tetë milionë eurove. “Ndihemi të qetë këtu” Nga hapja e resorteve të para në këtë rajon në vitin 2023, dyshja ka qenë vizitore e rregullt e zonës. Peizazhi i mahnitshëm natyror dhe paqja që ofron vendi ishin shtysë kryesore për këtë blerje. “Deti i Kuq është vërtet një vend i veçantë. Që nga vizita jonë e parë, unë dhe Georgina ndiem një lidhje me ishullin dhe bukurinë e tij natyrore. Ndihemi në paqe këtu. Tani që kemi shtëpinë tonë, mund të kalojmë kohë cilësore me familjen tonë, në privatësi dhe paqe të plotë, sa herë që duam”, u shpreh Ronaldo gjatë prezantimit të pronës. Sipas të dhënave nga kompania zhvilluese "Red Sea Global", ata radhiten ndër blerësit e parë të zonës rezidenciale dhe shfaqin interes për të zgjeruar më tej investimet e tyre në këtë destinacion. Një ishull luksoz në zemër të Detit të Kuq Kompleksi Nujuma bën pjesë në mega-projektin turistik të Detit të Kuq, përmes të cilit Arabia Saudite synon të tërhiqni vizitorë elitarë që kërkojnë pushime ekskluzive në harmoni me natyrën. I pozicionuar mes shkëmbinjve koralorë dhe ujërave ngjyrë bruz, ishulli shquhet për izolimin e tij gjeografik si një nga pikat më të forta. Ndryshe nga komplekset e zakonshme, fokusi këtu mbetet te privatësia e lartë, numri i reduktuar i vizitorëve dhe lidhja e ngushtë me mjedisin. Për çiftin e njohur, kjo pasuri i shtohet listës së gjatë të pronave në vende të ndryshme të botës, si në Spanjë, Portugali dhe Emiratet e Bashkuara Arabe. Kësisoj, përtej karakterit investues, shtëpia e tyre e re në Detin i Kuq përfaqëson një strehë familjare ku ata mund të shijojnë jetën e përditshme të shkëputur nga jeta publike.