Përplasja Ronaldo-Jesus, legjenda braziliane Romario therr trajnerin: Nuk mbajti fjalën, unë do ta kisha dërguar në djall

Përplasja e bujshme mes Cristiano Ronaldos dhe trajnerit Jorge Jesus vazhdon të ngjallë reagime të forta në arenën ndërkombëtare të futbollit. Kësaj radhe, në mbrojtje të sulmuesit portugez ka dalë hapur ish-sulmuesi legjendar i Brazilit, Romario, i cili gjatë një paraqitjeje në “Charla Podcast” ka mbështetur vendimin e yllit për të braktisur grumbullimin e kombëtares. “Nëse ngjarjet kanë rrjedhur sipas versionit që ka dhënë Ronaldo, atëherë është e qartë se Jorge Jesus nuk e ka mbajtur fjalën e dhënë. Një shtrëngim duarsh vlen shumë më tepër se çdo kontratë e shkruar. Kur dikush shkel një marrëveshje të tillë, tregon se nuk është njeri i ndershëm,” u shpreh fillimisht ish-kampioni i botës. Më tej, Romario ka vijuar me tone edhe më të ashpra, duke arsyetuar largimin e parakohshëm të 39-vjeçarit nga kampi portugez: “Nëse gjithçka ka ndodhur ashtu siç është treguar, Cristiano ka vepruar drejt që është larguar. Disa e quajnë largim të pajustifikuar, por ai ishte fyer tashmë. Pse vallë duhej të duronte një trajtim të tillë? Edhe unë personalisht do të kisha vepruar njësoj”. Sipas legjendës braziliane, shkas për këtë krisje është bërë fakti se Ronaldo u nxeh gjatë ndeshjes kundër Norvegjisë pa u aktivizuar fare, ndërsa situata u rëndua kur trajneri refuzoi të lexonte në konferencën për shtyp një mesazh të përgatitur nga vetë lojtari dhe stafi i tij. “Cristiano u ndie i nëpërkëmbur publikisht dhe i trajtuar si të mos vlerësohej fare. Në një rrethanë të tillë, unë do të kisha bërë saktësisht të njëjtën gjë. Madje, para se të largohesha nga grumbullimi, do ta kisha dërguar në djall trajnerin,” përfundoi deklaratën e tij Romario.