Arsenal armësh dhe uniforma ushtarake zbulohen në një objekt të pabanuar në Leposaviq

Uniformat blu kanë ndërhyrë gjatë ditës së mërkurë në fshatin Dren të komunës së Leposaviqit, ku gjatë kontrollit të një shtëpie të pabanuar kanë arritur të sekuestrojnë një armë zjarri dhe pajisje ushtarake. Operacioni është ndërmarrë menjëherë pas pranimit të një informate operative në stacionin policor, çka ka bërë që njësitet përkatëse të dalin në terren dhe të kryejnë një kontroll të detajuar në objekt. Sipas njoftimit zyrtar të Policisë së Kosovës, në vendin e ngjarjes janë gjetur dhe konfiskuar një armë e llojit AK-47, dy karikatorë të zbrazët, 119 copë fishekë të kalibrit 7.62×39 mm, si dhe elemente të veshjeve ushtarake përfshirë pantallona, një kapelë dhe një termos. Lidhur me këtë ngjarje, autoritetet policore kanë njoftuar prokurorin kujdestar, me udhëzim të të cilit kanë nisur hetimet dhe procedurat e nevojshme ligjore për zbardhjen e plotë të rrethanave.