Konflikti për pronën në Vushtrri degjeneron në kërcënim me vdekje: Nipi denoncon axhën se i drejtoi armën

Një konflikt pronësie mes familjarëve në fshatin Pasomë të Vushtrrisë dyshohet se ka kaluar kufijtë e një debati të zakonshëm, duke u shndërruar në një kërcënim serioz për jetën. Një burrë ka kërkuar ndihmën e Policisë, duke pretenduar se xhaxhai i tij e ka kanosur me vdekje duke i drejtuar armën e zjarrit. Ngjarja e rëndë dyshohet se ka ndodhur më 17 shtator, por rasti është denoncuar zyrtarisht në polici mbrëmjen e 6 tetorit, rreth orës 21:45. Sipas dëshmisë së viktimës me iniciale M.B., mosmarrëveshjet me axhën e tij (po ashtu me iniciale M.B.) lidhur me një pronë datonin prej kohësh. Ai ka deklaruar para hetuesve se i dyshuari kishte shkuar në shtëpinë e tij dhe, gjatë një përplasjeje verbale, i kishte drejtuar armën duke e kërcënuar me fjalët: “A e din se ju vras”. Në gjendje rreziku, ankuesi ka pohuar se kishte tentuar t'ia largonte armën nga dora të afërmit të tij. Pas marrjes së denoncimit, forcat e rendit dhe hetuesit policorë, në koordinim të plotë me Prokurorin e Shtetit, kanë bastisur dy lokacione të ndryshme që lidhen me të dyshuarin. Megjithatë, gjatë kontrolleve nuk është arritur të gjendet arma e përshkruar në dëshmi. I dyshuari M.B. është shoqëruar për intervistim në stacionin policor dhe pas dhënies së dëshmisë, me urdhër të prokurorit, është liruar për t'u hetuar në procedurë të rregullt. Ndaj tij është iniciuar rasti për veprat penale “Kanosje” dhe “Mbajtje në pronësi, kontroll ose posedim të paautorizuar të armës”, ndërsa hetimet po vijojnë për zbardhjen e plotë të rrethanave të ngjarjes.