Seancë maratonë në Kuvend: Nga komisioni hetimor për 'KAYO' te interpelancat me katër ministra

Kuvendi i Shqipërisë mblidhet sot në orën 10:00 për një seancë plenare të ngjeshur, e cila përfshin 18 çështje në rendin e ditës. Fokusin e diskutimeve do ta zënë katër interpelanca me anëtarë të kabinetit qeveritar, debatet mbi reformën administrativo-territoriale, si dhe një paketë e gjerë projektligjesh me ndikim në sektorë kyç të vendit. Pas miratimit të procesverbalit të seancës së 5 tetorit dhe njoftimeve përkatëse, punimet do të hapen me një interpelancë urgjente drejtuar ministrit të Punëve të Brendshme, Ervin Demo, kërkesë kjo e iniciuar nga deputetët e Grupit Parlamentar të Partisë Demokratike. Agjenda vijon me tre interpelanca të tjera: dy me ministrin e Infrastrukturës dhe Energjisë, Enea Karakaçi, të kërkuara nga deputetët Ermal Pacaj dhe Tedi Blushi, si dhe një interpelancë me ministrin e Financave, Petrit Malaj, gjithashtu e kërkuar nga deputeti Tedi Blushi. Një prej pikave më të debatuara pritet të jetë projektligji për ndarjen administrativo-territoriale të njësive të qeverisjes vendore në Republikën e Shqipërisë. Krahas kësaj, ligjvënësit do të shqyrtojnë ratifikimin e Konventës së Këshillit të Evropës për mbrojtjen e profesionit të avokatit, si dhe marrëveshjen me Maqedoninë e Veriut për pikat e përbashkëta të kalimit kufitar dhe kontrollet e integruara. Në rendin e ditës janë përfshirë edhe ndryshime të rëndësishme në legjislacionin bankar dhe sistemin e pagesave. Diskutimet në sallë do të shtrihen edhe te mbrojtja e mjedisit, treguesit gjeografikë për produktet artizanale, si dhe përditësimet ligjore mbi markat tregtare, patentat dhe modelet e përdorimit. Një moment kyç i seancës do të jetë votimi për ngritjen e komisionit hetimor parlamentar që do të verifikojë ligjshmërinë e veprimtarisë së shoqërisë shtetërore “KAYO” sh.a., lidhur me marrëveshjet e bashkëpunimit dhe tregtimin e armëve e pajisjeve ushtarake. Seanca do të mbyllet me shqyrtimin e ndryshimeve në përbërjen e komisioneve të përhershme të Kuvendit, ndërsa nuk do të mungojë as hapësira e dedikuar për çështje të tjera jashtë rendit të ditës, ku deputetët mund të adresojnë problematika të ndryshme aktuale.