Publikohen pamjet rrëqethëse: Momentet pas të shtënave nga 6-vjeçari ndaj mësueses në SHBA

Pas më shumë se tri vitesh nën vulën e heshtjes, pamjet e kamerave të trupit të policisë kanë zbardhur ngjarjen tronditëse të 6 janarit 2023 në shkollën fillore “Richneck” në Newport News, Virxhinia. Materiali vizual, i bërë publik pas një vendimi gjyqësor, shfaq kaosin dhe përballjen e parë të efektivëve me pasojat e aktit të rëndë, ku një nxënës vetëm 6 vjeç qëlloi me armë zjarri mësuesen e tij. Në videon treminutëshe, të regjistruar nga oficeri Brian Torrez, shihet momenti kur policia hyn në klasë dhe gjen fëmijën nën mbikëqyrjen e specialistes së leximit, Amy Kovac. Në ato çaste, mësuesja Abby Zwerner dhe nxënësit e tjerë kishin arritur të evakuoheshin nga ambienti i mësimit. Kovac udhëzon oficerët për vendndodhjen e armës, e cila u gjet në dysheme, pak metra larg të miturit. Hetimet konfirmuan se bëhej fjalë për një pistoletë 9 mm, ende me municion në karikator. Regjistrimet dëshmojnë gjithashtu sjelljen e pazakontë dhe agresive të 6-vjeçarit, i cili, ndërsa shan personelin dhe policët, pranon se arma i përkiste nënës së tij dhe shprehet indiferent ndaj pasojave ligjore. Ngjarja ndodhi kur fëmija nxori armën gjatë orës së mësimit dhe qëlloi Zwerner. Plumbi përshkoi dorën e mësueses përpara se ta godiste në kraharor, por pavarësisht plagëve, ajo tregoi kurajë duke siguruar largimin e nxënësve përpara se të kërkonte ndihmë mjekësore. Kjo tragjedi ndezi një debat të ashpër në Shtetet e Bashkuara për sigurinë në shkolla, veçanërisht pasi u zbulua se paralajmërimet e personelit mbi rrezikshmërinë e fëmijës ishin shpërfillur. Në nëntor të vitit 2025, pas një padie civile të ngritur nga Zwerner, një juri vendosi një dëmshpërblim prej 10 milionë dollarësh, pasi ish-zëvendësdrejtoresha Ebony Parker u shpall përgjegjëse për neglizhencë të rëndë. Pamjet e publikuara, ku fytyra e fëmijës është e mbuluar, u bënë të disponueshme për publikun pas kërkesës së mediave lokale për heqjen e urdhrit të konfidencialitetit.