Përplasje e ashpër: Zyrtari i VV-së, Alban Krasniqi, akuzon djalin e dëshmorit Xhavit Haziri për agjendë politike

Një përplasje e fortë ka ndodhur në distancë mes zyrtarit të Lëvizjes Vetëvendosje, Alban Krasniqi, dhe Çlirim Hazirit, djalit të dëshmorit të UÇK-së, Xhavit Haziri. Shkak për këtë reagim është bërë angazhimi i këtij të fundit lidhur me zhvillimet rreth Gjykatës Speciale, të cilin Krasniqi e ka cilësuar si një fushatë të orkestruar kundër partisë në pushtet. Sipas Krasniqit, ajo që fillimisht ishte prezantuar si një protestë qytetare, ka degraduar në një instrument politik të mbështetur nga zyrtarë dhe deputetë të Partisë Demokratike të Kosovës (PDK). Ai pretendon se Haziri po shfrytëzohet për të sulmuar Vetëvendosjen, ndërsa në krah të tij qëndrojnë pikërisht ata që, sipas Krasniqit, mbajnë përgjegjësinë për themelimin e Gjykatës Speciale. Në një postim mjaft kritik, Krasniqi e ka akuzuar Çlirim Hazirin për përpjekje për t'u shfaqur si një "patriot modern", duke vënë në pikëpyetje sjelljen e tij. Ai ka bërë një krahasim të drejtpërdrejtë me figurën e babait të tij, dëshmorit Xhavit Haziri, duke theksuar se veprimet e Çlirimit janë në kundërshtim të plotë me trashëgiminë e sakrificës së babait të tij. “Çlirim, mos e luaj komandantin veç pse në krah të rrinë llumi i Prontos e dokesh azgan krah tyre, gjoja kapo, i rrezikshëm dhe i paprekshëm”, shkroi ndër të tjera Krasniqi. Ai gjithashtu e ka kritikuar atë për promovimin e personave të cilësuar prej tij si “dezerterë” dhe për heshtjen ndaj përgjegjësve politikë që mundësuan funksionimin e Gjykatës Speciale, duke tentuar në mënyrë perfide, sipas Krasniqit, që fajin t’ia atribuojë Albin Kurtit dhe Vetëvendosjes. Në fund të reagimit të tij, zyrtari i VV-së e ka paralajmëruar Hazirin se një qasje e tillë do ta çojë drejt tjetërsimit politik, duke shtuar se modeli i tillë i veprimit është refuzuar prej kohësh nga qytetarët e Kosovës.