Incident i rëndë në Paris: Kryebashkiaku i Saint-Denis lëndohet nga gazi lotsjellës gjatë protestave studentore

Bally Bagayoko, kryetari i bashkisë së Saint-Denis, një qytet në periferi të Parisit, ka pësuar lëndime nga gazi lotsjellës teksa përpiqej të ndërmjetësonte për qetësimin e situatës mes forcave të rendit dhe protestuesve të rinj. Ngjarja ndodhi në momentin kur Bagayoko u vendos si mburojë njerëzore mes policisë së trazirave dhe pjesëmarrësve në marshimin e madh të organizuar në kryeqytetin francez, si shenjë kundërshtimi ndaj kushteve të rënduara në sistemin arsimor. Ky incident u regjistrua në një ditë mobilizimi masiv, ku mbi 266 mijë qytetarë anembanë Francës dolën në mbështetje të kauzës studentore, ndërsa vetëm në Paris u raportuan rreth 56 mijë protestues. Vala e pakënaqësisë nisi të shfaqej në mesin e shtatorit në një gjimnaz në Créteil, e nxitur nga problematika të shumta, si mbipopullimi i klasave, mungesa e stafit pedagogjik dhe amortizimi i rëndë i infrastrukturës shkollore. Lëvizja fitoi vrull të jashtëzakonshëm në një kohë rekord. Sipas statistikave të Ministrisë së Arsimit, deri në fillim të tetorit, protestat kishin përfshirë mbi një mijë shkolla të mesme, duke prekur kështu çdo të katërtën shkollë në vend. Aktualisht, kësaj nisme i janë bashkuar edhe studentët universitarë, prindërit, mësuesit dhe sindikatat e ndryshme, të cilët kërkojnë ndryshime rrënjësore në arsim.