Zgjedhjet në Serbi, ligjvënësi amerikan Wilson akuzon regjimin e Vuçiqit për manipulim

Kongresisti amerikan, Joe Wilson, ka hedhur akuza të rënda ndaj administratës së presidentit serb Aleksandar Vuçiq, duke e fajësuar atë për përpjekje të hapura për të tjetërsuar vullnetin e qytetarëve përmes manipulimit të procesit zgjedhor në vend. Përmes një deklarate të shpërndarë në platformat e tij zyrtare, politikani amerikan theksoi se ky regjim, i cili sipas tij po gëzon mbështetjen e Pekinit dhe Moskës, është i angazhuar drejtpërdrejt në vjedhjen e zgjedhjeve. Duke e vënë theksin te serioziteti i situatës, Wilson i është drejtuar me një apel urgjent faktorit ndërkombëtar dhe shteteve aleate që të mos qëndrojnë indiferentë ndaj këtyre zhvillimeve. "Komuniteti ndërkombëtar nuk duhet në asnjë mënyrë t'i mbyllë sytë para kësaj padrejtësie," ka përfunduar reagimin e tij ligjvënësi amerikan.