Eskalim golash në Kupën e Shqipërisë: Zbardhen të gjitha skuadrat e kualifikuara dhe çiftet e reja

Faza e 1/32-ve të Kupës së Shqipërisë është mbyllur me një lumë golash dhe ndeshje plot emocione, duke kompletuar kështu edhe kuadrin e skuadrave që do të vazhdojnë rrugëtimin në raundin pasardhës të 1/16-ve. Gjatë ditës së mërkurë u zhvilluan 13 takimet e mbetura të kësaj faze. Skuadra e Abissnet Superiores, Laçi, nuk ka zhgënjyer duke kaluar me sukses turin, pas një triumfi të thellë 8-2 ndaj Këlcyrës. Ndeshje e dominuar edhe nga Pogradeci, i cili shkatërroi Delvinën me shifrat e pastra 7-0. Një paraqitje bindëse regjistroi gjithashtu AF Luftëtari, duke i dhënë fund ëndrrës së Tomorit me një fitore 5-0 para tifozëve të vet. Ndërkohë, Shiroka ka siguruar një kualifikim komod në transfertë, pasi ka mposhtur Lushnjën me rezultatin e pastër 4-0. Besa ka treguar karakter duke përmbysur rezultatin për të mposhtur 4-1 Devollin, skenar i ngjashëm ky edhe për Kastriotin, i cili triumfoi 3-1 ndaj Luzit pas një fillimi të vështirë. Nga ana tjetër, Bylisi regjistroi një sukses 4-1 ndaj Albpetrolit, kurse Apolonia arkëtoi fitoren 3-1 kundër Maliqit. Spektakël i vërtetë është regjistruar në Kukës, ku vendasit kanë siguruar kualifikimin vetëm në sekondat e fundit falë një goli vendimtar, duke mposhtur Erzenin 3-2. Një ndeshje me gjashtë gola dhe ritëm të lartë ishte edhe ajo mes Ilirisë dhe Koplikut, e cila u mbyll me fitoren 4-3 për fushë-krijuesit. Me rezultatin e ngushtë 2-1, Butrinti eliminoi Orikun, ndërsa Korabi mposhti me të njëjtin rezultat Tërbunin. Një nga surprizat e kësaj faze e ka firmosur Eagle FA, e cila ka triumfuar 3-1 në transfertë përballë Burrelit. Vlen të kujtohet se një ditë më parë, Flamurtari dhe Skënderbeu kishin prerë biletën për në fazën tjetër pas fitoreve 4-1 ndaj Gramshit dhe Naftëtarit, ndërsa Besëlidhja vuajti më shumë se ç'duhej, duke siguruar suksesin 2-1 ndaj Sopotit vetëm pas kohës shtesë. Me përfumimin e këtyre sfidave, tashmë janë përcaktuar zyrtarisht edhe çiftet që do të përballen mes tyre në raundin e 1/16-ve të këtij kompeticioni prestigjioz.