Tre vjet nga masakra e Hamasit në Izrael, Rama: Të mos lejojmë që antisemitizmi të fshihet pas heshtjes

Kryeministri Edi Rama ka përcjellë një mesazh të fuqishëm në trevjetorin e sulmeve të 7 tetorit 2023 në Izrael, duke nderuar kujtimin e viktimave dhe duke shprehur solidaritet me të mbijetuarit e kësaj ngjarjeje tragjike. Nëpërmjet një reagimi në platformën sociale X, kreu i qeverisë shqiptare ka dënuar me forcë aktet e terrorizmit dhe antisemitizmin, duke vënë theksin te rëndësishmja e ruajtjes së memories kolektive. Sipas tij, për familjarët që humbën njerëzit e tyre më të dashur dhe për ata që i mbijetuan atij tmerri, dita e 7 Tetorit mbetet një plagë e hapur që vazhdon të kullojë dhimbje. “Kanë kaluar tre vjet nga tmerri i 7 Tetorit. Por duhet ta kuptojmë të gjithë se, për familjet, të dashurit e të cilave u vranë nga kasapët e Hamasit, për ata të cilëve iu shkatërruan jetët dhe për të mbijetuarit që mbajnë plagë që asnjë sy nuk mund t’i shohë, ajo mëngjes nuk ka përfunduar kurrë vërtet”, ka shkruar Rama në mesazhin e tij. Kryeministri ka sjellë ndërmend gjithashtu vizitën e tij në vendin ku u mbajt festivali i muzikës Nova, ku një numër i madh të rinjsh humbën jetën gjatë sulmit brutal. “Ka vende ku heshtja flet më fort se fjalët dhe Nova është një prej tyre”, shkruan ai, duke shtuar se ata të rinj ishin mbledhur për të festuar jetën, por u goditën nga errësira e urrejtjes dhe e terrorit. Në këtë kuadër, Rama ka evokuar vlerën e trashëguar të “Besës” shqiptare, duke sjellë në vëmendje historikun e popullit shqiptar gjatë Holokaustit, kur familjet tona hapën dyert për të strehuar hebrenjtë nga rreziku i nazizmit. “Në Shqipëri kemi një fjalë që përmban një kod të tërë moral: Besa. Një premtim që nuk mund të thyhet”, thekson kreu i ekzekutivit shqiptar. Në vlerësimin e tij, ky bagazh i rëndësishëm historik e obligon shoqërinë të mos lejojë kurrë normalizimin e urrejtjes ndaj hebrenjve dhe të mbajë gjallë kujtesën për viktimat e pafajshme. “Duhet që kujtesa të mos i dorëzohet indiferencës, që dhimbja të mos braktiset në vetmi, që antisemitizmi të mos lejohet më kurrë të fshihet pas heshtjes, sloganeve apo justifikimeve dhe që t’u qëndrojmë besnikë miqve tanë edhe në orët e tyre më të errëta”, ka shtuar më tej kryeministri. Në mbyllje të reagimit të tij zyrtar, Rama u ka dërguar një mesazh ngushëllimi dhe solidariteti të gjitha familjeve që sot përkujtojnë humbjen e të afërmve të tyre. “Për çdo nënë, baba, fëmijë dhe familje që vajton sot: Kujtimi i të dashurve tuaj qoftë një bekim i përjetshëm”, përfundon ai.