Aventura angleze në rrezik: Florian Wirtz zhgënjen te Liverpooli, legjenda gjermane sugjeron transferimin te Barcelona

Aventura e Florian Wirtz te Liverpooli nuk po ecën në rrugën e duhur. Mesfushori gjerman, i cili u transferua në “Anfield” verën e kaluar nga Bayer Leverkuseni për shifrën e majme prej 125 milionë eurosh, ende nuk ka arritur të reflektojë në tokën angleze atë formë shpërthyese që e katapultoi në listën e lojtarëve më të kërkuar në kontinent. Gjatë kohës kur mbrojtur ngjyrat e Bayer Leverkusenit, Wirtz ishte figura kyçe që udhëhoqi skuadrën drejt titullit kampion në Gjermani, nën urdhrat e trajnerit të atëhershëm Xabi Alonso. Para se të vendoste për lëvizjen e madhe, shërbimet e tij ishin në radarët e gjigantëve evropianë si Bayern Munichu dhe Real Madridi. Pavarësisht interesimit masiv, lojtari zgjodhi “The Reds”, por starti i tij në Premier Ligë ka mbetur larg pritshmërive. Si pasojë e kësaj ecurie, drejtuesit e klubit anglez kanë nisur tashmë të studiojnë alternativa të mundshme për mesfushën. Kjo situatë ka nxitur edhe reagimin e figurave të njohura të futbollit, ku së fundmi ka folur legjenda gjermane Oliver Bierhoff, i cili ka hapur hapur dritën jeshile për një të ardhme të mundshme të bashkëkombësit të tij te Barcelona. Ish-sulmuesi i njohur vlerëson se katalanasit, falë filozofisë së trajnerit Hansi Flick, do të ishin skena e përsosur për talentin e tij. “Do të dëshiroja shumë ta shihja Wirtzin te Barcelona. Jam i bindur se ai do të shkëlqente nën urdhrat e Flickut atje. Ai do të gjente hapësira të bollshme dhe bashkëlojtarë të një niveli të lartë. Shpresoj që kjo rrugë të kryqëzohet një ditë”, ka deklaruar Bierhoff. Edhe pse Wirtz ka edhe katër vite të tjera në kontratën e tij aktuale me Liverpoolin, paraqitjet e zbehta kanë ndikuar edhe në vlerën e tij në treg, e cila tashmë përflitet se ka rënë në rreth 80 milionë euro. Gjatë edicionit aktual, ai ka regjistruar gjashtë paraqitje me fanellën e klubit anglez, por ende nuk ka arritur të gjejë rrugën e rrjetës. Ndonëse një kalim i menjëhershëm te Barcelona mbetet i ndërlikuar për shkak të profilit të lojtarëve që katalanasit kanë aktualisht në dispozicion, dinamikat e merkatos së futbollit nuk lënë vend për absolutizma. Mbetet për t'u parë nëse mesfushori do të gjejë forcën për të përmbysur situatën te Liverpooli apo do të kërkojë një ambient të ri për të rigjetur shkëlqimin.