Banka e Shqipërisë jep alarmin: Tensionet globale do të shtrenjtojnë çmimet gjatë gjysmës së parë të vitit të ardhshëm

Qytetarët shqiptarë mund të përballen me një valë të re të shtrenjtimit të produkteve gjatë gjashtëmujorit të ardhshëm, pasi tregjet ndërkombëtare vazhdojnë të ndikohen nga pasiguritë dhe situata e tensionuar gjeopolitike. Gjatë konferencës për politikën monetare, guvernatori i Bankës së Shqipërisë, Gent Sejko, bëri të tregohet kujdes duke theksuar se projeksionet e reja tregojnë një tendencë rritëse të inflacionit për dy tremujorët e ardhshëm, ndonëse ky fenomen vlerësohet si i kufizuar në kohë dhe intensitet. “Përditësimi i parashikimeve tregon se inflacioni ka gjasa të rritet më tej gjatë dy tremujorëve në vijim. Megjithatë, kjo rritje pritet të jetë e moderuar dhe e përkohshme. Më pas, duke filluar nga mesi i vitit të ardhshëm, inflacioni pritet të vijë në rënie graduale drejt objektivit. Nga ana tjetër, vëllimi i aktivitetit ekonomik në vend pritet të rritet me ritme të qëndrueshme dhe pranë potencialit, duke pasqyruar bazat solide të rritjes dhe ambientin stimulues financiar”, u shpreh guvernatori i Bankës së Shqipërisë, Gent Sejko. Pavarësisht presioneve të reja mbi çmimet, autoriteti monetar ka vendosur të mos ndryshojë normën bazë të interesit, mbështetur nga ecuria pozitive e ekonomisë vendase, e cila shënoi një rritje prej 3.6% në tremujorin e dytë, ndërsa hovi i kredidhënies për sektorin privat ka arritur në 15.4%. “Bazuar në këto konsiderata, Këshilli Mbikëqyrës vendosi të mbajë të pandryshuar qëndrimin e politikës monetare në mbledhjen e sotme. Megjithatë, këto parashikime, si dhe prania e rreziqeve të kahut të sipërm mbi inflacionin, forcojnë premisat për një lëvizje në kahun normalizues të qëndrimit të politikës monetare në të ardhmen”, shtoi kreu i bankës qendrore. Aktualisht, treguesi i inflacionit ka tejkaluar objektivin e përcaktuar, duke regjistruar nivelin 3.2%, ndërkohë që shporta e ushqimeve zë rreth 40% të totalit të buxhetit mujor për familjet në vend. Çdo lëvizje e mëtejshme e çmimeve pritet të rëndojë ndjeshëm buxhetin familjar të qytetarëve.