Ndeshja Shqipëri-Bjellorusi: Policia zbardh planin e masave dhe bllokimet e qarkullimit në kryeqytet

Policia e Shtetit ka përgatitur një plan të detajuar masash për të garantuar rendin dhe sigurinë publike përpara, gjatë dhe pas përfundimit të sfidës futbollistike ndërmjet kombëtares së Shqipërisë dhe asaj të Bjellorusisë, e cila do të luhet mbrëmjen e sotme në orën 20:45, në stadiumin “Air Albania”. Ky operacion sigurie mbështetet te praktikat e suksesshme të menaxhimit të ngjarjeve të mëdha ndërkombëtare, duke koordinuar të gjitha strukturat përgjegjëse për një mbarëvajtje sa më të qetë të këtij eventi sportiv. Për të lehtësuar qarkullimin e automjeteve në qytetin e Tiranës dhe për të garantuar sigurinë e pjesëmarrësve, datën 26.09.2026, duke filluar nga ora 17:00 e deri në mbyllje të ndeshjes, Policia e Shtetit në bashkëpunim me Policinë Bashkiake do të zbatojë kufizime të lëvizjes së mjeteve në disa segmente rrugore pranë impianteve sportive. Më konkretisht, akset që do të bllokohen plotësisht gjatë kësaj fashë orare janë: - Bulevardi “Dëshmorët e Kombit”, nga fast food-i “Laguna”, pranë urës së ish-Hotel Dajtit; - Rruga “Papa Gjon Pali II”, te kryqëzimi i RTSH-së; - Rruga “Dervish Hima”, pranë Ambasadës së SHBA-së; - Rruga “Asim Zeneli”, pranë Ambasadës së SHBA-së; - Rruga “Themistokli Gërmenji”, në hyrje; - Rruga “Ismail Qemali”, te kryqëzimi i RTSH-së; - Rruga “Lekë Dukagjini”, pranë ish-Gardës së Republikës (koridor hyrjeje për në parkimin e caktuar, vetëm për mjetet e autorizuara nga FSHF-ja); - Rruga “Abdyl Frashëri”, pranë kryqëzimit të Librit Universitar; - Te sheshi “Ëillson”, devijohet lëvizja në drejtim të rrugës “Sami Frashëri”, pak para përfundimit të ndeshjes. Ndërkohë, drejtuesit e automjeteve do të kenë mundësi të qarkullojnë lirisht në Rrugën e Elbasanit, në Unazë dhe në bulevardin “Bajram Curri”, të cilat do të mbeten të hapura. Në kuadër të këtij plani operacional, efektivët e policisë do të kryejnë kontrolle të rrepta ndaj të gjithë tifozëve në pikat e hyrjes së stadiumit. Kjo masë vjen për të parandaluar futjen e sendeve të ndaluara, si banderola me mesazhe raciste, fishekzjarrë, flakadanë, mjete piroteknike, monedha metalike, çadra, çakmakë, karikues celularësh, produkte kozmetike apo çdo objekt tjetër të fortë që përbën rrezik për sigurinë fizike të të pranishmëve. Tifozët këshillohen të paraqiten pranë dyerve hyrëse të stadiumit duke filluar nga ora 18:30. Autoritetet theksojnë se për shkak të fluksit të lartë, mbërritja në minutat e fundit mund t'u pamundësojë hyrjen në kohë në impiant. Për të siguruar mbarëvajtjen maksimale të këtij takimi, Policia e Shtetit ka angazhuar qindra efektivë në terren, të cilët përveç ruajtjes së rendit, do të qëndrojnë në shërbim të qytetarëve për çdo nevojë, me qëllim që ngjarja të mbyllet pa asnjë incident dhe të mbrohet imazhi sportiv i vendit.