“E mora rrugës, më tha se quhej Berti” – Zbardhet dëshmia e ish-zyrtarit të policisë të arrestuar krah Ergys Agasit

Janë zbardhur deklarimet para organeve të drejtësisë të Ulian Shpatarakut, ish-asistentit të Drejtorit të Departamentit të IT-së në Policinë e Shtetit. Ai u prangos pak kohë më parë në kuadër të një operacioni ku u vu në pranga edhe personi i shpallur në kërkim, Ergys Agasi. Gjatë marrjes në pyetje, Shpataraku ka mohuar me forcë çdo lidhje apo dijeni se personi që kishte pranuar në automjet ishte Agasi, duke këmbëngulur se bëhej fjalë për një rastësi të plotë rrugore. Sipas dokumentit zyrtar të dëshmisë, ish-efektivi ka deklaruar para hetuesve se nuk ka shkelur ligjin dhe nuk është i përfshirë në asnjë veprimtari të paligjshme. Duke detajuar lëvizjet e tij, Shpataraku ka treguar se një natë para ngjarjes ishte nisur drejt Durrësit, konkretisht në zonën e Kënetës te vjehrri i tij, pasi djali i mitur ishte prekur nga ethet dhe kishte temperaturë të lartë. Mëngjesin e pasardhësit, ai kishte planifikuar të udhëtonte drejt qytetit të Elbasanit. Sipas shpjegimeve të tij, automjeti i tij personal kishte shfaqur probleme me mbinxehjen e motorit, çka e kishte detyruar t'ia linte atë një miku të tij po në zonën e Kënetës, ndërkohë që kishte marrë në përdorim një makinë tjetër të tipit “Audi A6”. “Fakti që të vesh te tregu nuk përbën krim dhe nuk të bën kriminel. Unë udhëtova nga aksi i vjetër i Elbasanit për shkak të trafikut të rënduar që njihet nga të gjithë në Shqipëri. Shkova, takova dy të njohur, piva një kafe te lavazhi-servis ‘Renato’ dhe u ktheva,” ka pohuar ai në dëshminë e tij. Shpataraku ka rrëfyer se në rrugën e kthimit, teksa po lëvizte në të njëjtin aks të vjetër, kishte ndaluar për t'i dhënë makinës një kalimtari që i kishte bërë shenjë me dorë. Ai u shpreh se, si besimtar dhe i udhëhequr nga parimet morale për të mos lënë njerëz në rrugë, nuk ka hezituar të ofrojë ndihmë. “Si mund ta kisha njohur z. Agasi që kërkohej nga drejtësia, kur ai u fut në makinë i veshur me pantallona të shkurtra, kapele, mjekër të rritur dhe me shapka? Gjatë bisedës në makinë më tha se quhej Berti dhe se merrej me tregtinë e dyerve të aluminit. Në atë çast nuk kisha as idenë më të vogël se kush ishte realisht,” ka argumentuar ai para hetuesve. Mes të tjerash, ish-punonjësi i policisë ka hedhur poshtë akuzat se e ka shoqëruar Agasin në drejtim të tregut të Elbasanit apo zonës së Shkozetit, duke shtuar se sipas analizës së tij, raporti i vëzhgimit të SPAK-ut ndalet në Bradashesh dhe nuk dokumenton praninë e tij në vendet e përmendura. I pyetur nga hetuesit për detajet e komunikimit apo targën e automjetit që ka përdorur, ai ka përgjigjur se nuk i kujtohet me saktësi. Në lidhje me kohën kur ka shërbyer në radhët e policisë, Shpataraku theksoi se as ai dhe as kolegët e tij nuk kishin mundësi apo detyrim t'i mbanin mend përmendësh fytyrat e të gjithë personave që figuronin në listat e kërkimit policor.