Goditet rrjeti i shpërndarjes së drogës pranë shkollave në Librazhd, vihet në pranga 27-vjeçari

Strukturat e Policisë në Librazhd kanë kurorëzuar me sukses operacionin policor të koduar “Zhvendosja”, përmes të cilit është parandaluar dhe goditur një rast i shitjes së lëndëve narkotike në doza të vogla, pranë shkollave dhe zonave të tjera të ndjeshme. Si rezultat i ndërhyrjes, është bërë i mundur arrestimi në flagrancë i shtetasit E. C., 27 vjeç, banues në Durrës, ndërsa është nisur procedimi penalisht në gjendje të lirë për 21-vjeçarin M. T., i cili ndodhej në shoqërinë e tij. Sipas burimeve zyrtare të policisë, hetimet paraprake tregojnë se i riu nga Durrësit ishte vendosur përkohësisht në qytetin e Librazhdit dhe lëvizte vazhdimisht vendbanimin, taktikë kjo që përdorej për t'i shpëtuar drejtësisë dhe për të ushtruar aktivitetin e paligjshëm të shitjes së lëndës narkotike në afërsi të institucioneve arsimore. Gjatë kontrollit të detajuar fizik, uniformat blu i gjetën 27-vjeçarit sasi të konsiderueshme lënde të dyshuar narkotike, të llojeve kokainë dhe Cannabis Sativa, të cilat ishin ndarë paraprakisht në dhjetëra doza dhe ishin bërë gati për t'u shitur. Ndërkaq, gjatë kontrollit të ushtruar ndaj shtetasit M. T., i cili shoqëronte të dyshuarin, efektivët gjetën dhe sekuestruan një armë të ftohtë (thikë), për të cilën ai do të përgjigjet penalisht në gjendje të lirë. Në vijim të verifikimeve të mëtejshme, grupi hetimor konstatoi se automjeti me të cilin i riu transportonte dhe shpërndante dozat e lëndëve narkotike drejtohej prej tij pa qenë i pajisur me lejen përkatëse të drejtimit. Në cilësinë e provës materiale, autoritetet bënë sekuestrimin e dozave të dyshuara të kokainës dhe kanabisit, mjetit motorik që përdorej nga i arrestuari, armës së ftohtë (thikë), si dhe tre aparateve celulare që dyshohet se përdoreshin për koordinimin e aktivitetit. Ky operacion u zhvillua nga specialistët e Seksionit për Hetimin e Narkotikëve, të mbështetur nga homologët e Seksionit për Mbështetjen Operacionale të Hetimit, nën drejtimin e Prokurorisë, pasi u sigurua informacion i besueshëm në rrugë operative. Në përfundim të veprimeve të para hetimore, materialet procedurale i kaluan Prokurorisë pranë Gjykatës së Shkallës së Parë për ndjekje të mëtejshme penale.