Ndikimi i njeriut: Si po detyrohet monali i Himalajeve të ndryshojë mënyrën e komunikimit

Zgjerimi i aktivitetit njerëzor dhe zhvillimi i infrastrukturës po lënë shenja të dukshme te monali i Himalajeve, simboli i krahinës indiane të Uttarakhandit dhe shpendi kombëtar i Nepalit. Dy studime të fundit të realizuara nga hulumtuesit indianë tregojnë se ky specie po përballet me presione serioze që po transformojnë si habitatin ashtu edhe sjelljen e tij komunikuese. Sipas gjetjeve të para, zvogëlimi i livadheve alpine për shkak të ndërhyrjeve njerëzore ka detyruar monalët të braktisin zonat e zakonshme dhe të kërkojnë strehë në lartësi më të mëdha gjeografike. Kjo tendencë, e kombinuar me efektet e ndryshimeve klimatike, parashikohet ta zvogëlojë dhe copëtojë edhe më shumë habitatin e tyre deri në vitin 2100, duke rrezikuar kështu suksesin e riprodhimit dhe duke shtuar gjasat për zhdukje lokale. Në një tjetër hulumtim, shkencëtarët kanë analizuar më shumë se 700 thirrje të këtij shpendi në dy lugina të Uttarakhandit. Rezultatet dëshmojnë se në mjediset e ngarkuara me trafik dhe prani njerëzore, monalët adaptohen duke përdorur frekuenca më të larta dhe thirrje më të shkurtra, për të arritur të komunikojnë mes ndotjes akustike. Studiuesit sqarojnë se ky reagim përbën një përshtatje të menjëhershme sjelljeje dhe jo një zhvillim evolucionar afatgjatë. Ekspertët vlerësojnë se këto ndryshime në sjellje dhe në mjedisin jetësor përbëjnë një kambanë alarmi për ekuilibrin e brishtë ekologjik të Himalajeve. Presioni i vazhdueshëm i ushtruar nga turizmi masiv, urbanizimi, zgjerimi i infrastrukturës dhe ngrohja globale po rrezikon seriozitetin e mbijetesës së faunës vendase në këtë rajon.