Sulm me armë në një kafene në Athinë: Plagoset 10-vjeçarja me origjinë shqiptare

Një ngjarje e rëndë ka tronditur kryeqytetin grek mbrëmjen e vonë të së premtes, ku në zonën e Agios Panteleimonas në Athinë është regjistruar një atentat me armë zjarri që ka lëshuar pasoja të rënda, duke lënduar një të mitur. Sipas informacioneve zyrtare, rreth orës 23:50 me orën lokale, një automjet ku ndodheshin katër persona u afrua pranë një lokali të vendosur në rrugën “Agorakritou” nr. 32 dhe hapi zjarr drejt tij. Si pasojë e breshërisë së plumbave, një vajzë rreth 10 vjeç u plagos në zonën e këmbës. Autoritetet policore ende nuk kanë dalë në një përfundim përfundimtar për të përcaktuar nëse plagosja e së miturës është shkaktuar drejtpërdrejt nga predha e armës apo nga fragmentet e objekteve të dëmtuara gjatë të shtënave. Përballë kësaj situate emergjente, nëna e fëmijës, e cila është me origjinë nga Shqipëria, nuk ka pritur mbërritjen e autoambulancës, por e ka transportuar me shpejtësi vajzën e saj drejt Spitalit të Fëmijëve “Aglaia Kyriakou” për t'i siguruar ndihmën e nevojshme mjekësore. Në çastin kur ndodhi sulmi, brenda ambientit të lokalit ndodheshin dhjetë persona, të cilët rezultojnë të jenë të gjithë shtetas shqiptarë. Ndërkohë, automjeti i përdorur nga autorët është zbuluar i shkrumbuar nga flakët në zonën e Aspropirgos menjëherë pas kryerjes së krimit.