Bedri Hamza: Beteja për drejtësi meriton mbështetjen e plotë të shtetit, çlirimtarët nuk do të mbeten vetëm

Kryetari i Partisë Demokratike të Kosovës (PDK), Bedri Hamza, ka deklaruar se nata e kaluar ka qenë sfiduese dhe e gjatë për vendin, por sipas tij, ajo mund të shërbejë si një pikë kthese drejt një të ardhmeje më të qëndrueshme për shtetin. Gjatë reagimit të tij, kreu i opozitës ka theksuar se institucionet e Kosovës duhet të luajnë një rol kyç në mbrojtjen e vlerave të luftës. Në këtë kuadër, Hamza ka shprehur besimin se bashkëpunimi me shtetin dhe Presidenten e re, Justina Shiroka-Pula, do të rezultojë në një angazhim shumë më të fuqishëm institucional për ish-krerët e Ushtrisë Çlirimtare të Kosovës (UÇK). Ai ka vlerësuar se kjo është thelbësore për mbrojtjen e të vërtetës dhe pastërtisë së luftës çlirimtare përmes një beteje të drejtë ligjore. "Beteja për drejtësi në Hagë nuk mund të bëhet më vetëm nga individët, familjet, dashamirët dhe mbrojtësit e tyre, të cilët tash e gati gjashtë vjet po e bartin mbi supet e tyre peshën e rëndë të këtij procesi. Shteti ynë tani duhet të jetë pranë tyre, me të gjitha kapacitetet dhe përgjegjësitë që i takojnë", ka theksuar ndër të tjera kreu i PDK-së, Bedri Hamza.