Kriza politike në Kosovë, Ali Ahmeti: U shmangën zgjedhjet e reja, urime presidencës së re

Kryetari i Bashkimit Demokratik për Integrim (BDI), Ali Ahmeti, ka dhënë reagimin e tij lidhur me zhvillimet e fundit në skenën politike të Kosovës, pas zgjedhjes së Justina Shiroka-Pulës në krye të shtetit. Nëpërmjet një postimi në platformat e tij zyrtare, Ahmeti ka përgëzuar pjekurinë dhe ndërgjegjen shtetërore të udhëheqësve kosovarë. Sipas tij, ata dëshmuan aftësi në tejkalimin e ngërçit politik, duke i kursyer vendit një proces të kushtueshëm të zgjedhjeve të parakohshme parlamentare. Kreu i BDI-së i ka përcjellë urimet e tij më të sinqerta Shiroka-Pulës për marrjen e kësaj detyre të lartë, duke i uruar fat, maturi dhe suksese në përmbushjen e mandatit të saj drejtues. “Presidente Prof. Dr. Justina Shiroka-Pula, urime për përgjegjësinë e re dhe detyrën e lartë shtetërore! Ju uroj shumë sukses, urtësi dhe arritje në ushtrimin e këtij misioni të rëndësishëm në shërbim të Republikës së Kosovës dhe qytetarëve të saj”, ka shkruar Ahmeti. Gjatë reagimit të tij, lideri i BDI-së vuri theksin te domosdoshmëria e ruajtjes së konsolidimit institucional, duke kërkuar që interesat e përgjithshme shtetërore dhe qytetare të vendosen gjithmonë para atyre ngushtësisht partiake. “Stabiliteti institucional, përqendrimi te zgjidhjet që i ofrojnë të ardhme më të mirë qytetarëve dhe vendosja e interesit shtetëror e qytetar mbi atë partiak duhet të jenë gjithmonë udhërrëfyes për autoritetet politike të Republikës së Kosovës”, u shpreh ai.