Refuzimi i Trump: Uashingtoni mbyll derën për armëpushimin 7-ditor me Iranin

Presidenti i Shteteve të Bashkuara, Donald Trump, ka vendosur të mos e pranojë ofertën e Teheranit për një armëpushim njëjavor, duke lënë të kuptohet se operacionet ushtarake amerikane ndaj Iranit nuk do të ndalen. Sipas raportimeve të fundit, kreu i Shtëpisë së Bardhë u ka bërë të qartë bashkëpunëtorëve të tij se synon që fushatat e bombardimeve të vijojnë edhe pas zgjedhjeve të mesit të mandatit në nëntor. Ky zhvillim vjen pas një propozimi konkret të paraqitur nga autoritetet iraniane për normalizimin e situatës në Ngushticën e Hormuzit. Ministri i Jashtëm i Iranit, Abbas Araghchi, gjatë pjesëmarrjes së tij në Asamblenë e Përgjithshme të OKB-së, bëri të ditur se Teherani ka hartuar një plan të detajuar për rihapjen e këtij aksi strategjik detar. Sipas kryediplomatit iranian, nëse Uashingtoni pranon të plotësojë kushtet e caktuara, lundrimi i lirë në Ngushticën e Hormuzit mund të rikthehet brenda një harku kohor prej shtatë ditësh. Araghchi theksoi se vendimi final tashmë ndodhet në duart e palës amerikane, duke shtuar se kërkesat e Iranit nuk përfaqësojnë diçka të panjohur. Në deklaratën e tij, ministri iranian nënvizoi se këto kërkesa janë të sanksionuara tashmë në memorandumin e mirëkuptimit të nënshkruar nga të dyja vendet gjatë muajit qershor, duke i bërë thirrje SHBA-së që t'u përmbahet zotimeve të mëparshme.