Përplasje e rëndë në Vlorë: Pesë të lënduar pas aksidentit në zonën e Nartës

Një aksident rrugor me pasoja në njerëz është regjistruar mëngjesin e kësaj të mërkure në aksin e njohur si “Jalli i Nartës” në qytetin e Vlorës. Përplasja ka përfshirë dy mjete, përkatësisht një “Fiat” dhe një “Volkswagen”. Në automjetin tip “Volkswagen” udhëtonin disa shtetas të huaj, me origjinë nga India, të cilët ishin duke shkuar drejt vendit të tyre të punës kur u përfshinë në këtë incident rrugor. Si pasojë e impaktit të fuqishëm, pesë persona kanë pësuar lëndime trupore. Ata janë dërguar menjëherë drejt Spitalit Rajonal të Vlorës, ku kanë marrë trajtimin e nevojshëm mjekësor. Sipas informacioneve të deritanishme, pacientët ndodhen nën kujdesin e stafit mjekësor dhe fatmirësisht janë jashtë rrezikut për jetën. Në vendin e ngjarjes kanë mbërritur forcat e Policisë së Vlorës, të cilat kanë nisur procedurat hetimore për të zbardhur shkaqet dhe dinamikën e plotë të këtij aksidenti.