Buxheti i vitit 2027, Rama zbulon shifrën historike: Pritet të arrijë 10 miliardë euro

Kryeministri Edi Rama ka bërë të ditur se qeveria shqiptare po punon intensivisht mbi planifikimin e Buxhetit për vitin 2027, i cili pritet të shënojë një moment historik për ekonominë e vendit. Përmes një komunikimi në rrjetet sociale, kreu i qeverisë ka ndarë detaje nga diskutimet e zhvilluara me kabinetin qeveritar dhe grupin parlamentar socialist. Në fokus të këtyre takimeve, të cilat Rama i ka cilësuar si pjesë e angazhimit të vazhdueshëm në kuadër të nismës “Prania Besnike”, ka qenë hartimi i një buxheti që synon të thyejë tavanin e 10 miliardë eurove. Sipas kryeministrit, ky objektiv ambicioz është i mundur falë performancës pozitive dhe rritjes së qëndrueshme të ekonomisë kombëtare. Sipas kreut të ekzekutivit, qëllimi kryesor i këtij buxheti rekord është që të ardhurat shtesë të gjeneruara nga zhvillimi ekonomik të rishpërndahen në mënyrë më efikase për qytetarët. Rama e ka shoqëruar njoftimin e tij edhe me pamje nga takimi i punës me ministrat dhe deputetët, duke konfirmuar se fokusi mbetet te konsolidimi i zhvillimit ekonomik në vitet në vijim.