Kuvendi i Kosovës voton ndryshimet për Specialen: Kufizohet mandati dhe kompetencat e gjykatës në Hagë

Kuvendi i Kosovës ka miratuar në lexim të dytë Projektligjin për ndryshimin dhe plotësimin e ligjit mbi Dhomat e Specializuara, duke siguruar 88 vota për. Ky proces u mbështet nga deputetët e Lëvizjes Vetëvendosje, PDK-së dhe Aleancës për Ardhmërinë e Kosovës, ndërsa përfaqësuesit e LDK-së zgjodhën të mos marrin pjesë në votim. Projektligji u miratua me një amendament shtesë. Nisma, e iniciuar nga Partia Demokratike e Kosovës, synon të bëjë një rishikim rrënjësor të mandatit të kësaj gjykate me seli në Hagë, duke kufizuar juridiksionin e saj kohor, lëndor dhe territorial. Deri më tani, gjykata kishte autoritetin të gjykonte veprat penale nga 1 janari 1998 deri më 31 dhjetor 2000, por ndryshimet e reja e ngushtojnë këtë hapësirë vetëm në periudhën pasluftës, nga 1 korriku 1999 deri në fund të vitit 2000. Sipas nenit 2 të këtij projektligji, kompetencat e Dhomave të Specializuara do të përqendrohen ekskluzivisht në veprat që ndërlidhen me trafikimin e organeve, indeve apo qelizave njerëzore, siç janë përshkruar në raportin e Asamblesë Parlamentare të Këshillit të Evropës. Po ashtu, gjykata do të ketë juridiksion vetëm për vrasjet e paligjshme, torturat dhe trajtimet mizore që kanë ndodhur në vendet e ndalimit të identifikuara në të njëjtin raport, përderisa ato lidhen drejtpërdrejt me marrjen e organeve. Projektligji saktëson se gjykata nuk do të ketë më kompetencë për krime të përgjithshme lufte, krime kundër njerëzimit apo dhunë politike që nuk janë pjesë e këtyre akteve specifike. Në rastet kur procedurat aktuale bien jashtë këtij juridiksioni të ri, neni 6 parashikon transferimin e tyre në Departamentin Special të Gjykatës Themelore në Prishtinë, ndërsa hetimet dhe dosjet e ndjekjes do t'i kalojnë Prokurorisë Speciale të Kosovës. Për personat që aktualisht ndodhen në paraburgim, projektligji parasheh kthimin e tyre në Kosovë, ku brenda 48 orësh duhet të dalin para një gjyqtari vendor për të vlerësuar masën e sigurisë sipas Kodit të Procedurës Penale. Dokumenti gjithashtu vendos një tavan për dënimet me burgim, duke kufizuar kohëzgjatjen e tyre në maksimum 15 vjet. Për më tepër, neni 17 hap mundësinë që të dënuarit me vendime të formës së prerë të kërkojnë falje individuale nga Presidenti i Kosovës. Kjo nismë ligjore vjen në një moment të ndjeshëm, vetëm pesë ditë pasi u shpall aktgjykimi ndaj ish-krerëve të UÇK-së, Hashim Thaçit, Kadri Veselit, Jakup Krasniqit dhe Rexhep Selimit, të cilët u dënuan me gjithsej 81 vjet burgim.