KEDS njofton ndërprerje të energjisë elektrike për të shtunën: Ja zonat që preken nga punimet

Kompania për Distribuimin e Energjisë Elektrike në Kosovë (KEDS) ka bërë të ditur se gjatë ditës së shtunë, më 26 shtator 2026, do të realizohen punime të nevojshme për mirëmbajtjen dhe sigurinë e sistemit energjetik. Si rrjedhojë, disa zona në vend do të përballen me ndërprerje të përkohshme të furnizimit me rrymë. Në rajonin e Prishtinës, për shkak të ndërrimeve të pajisjeve në TS 110/10kV Prishtina 5, nga ora 08:30 deri në 18:00, pa energji do të mbetet dalja 10kV Kodra e Trimave 4. Zonat e prekura përfshijnë pjesë të rrugëve: Mic Sokli, Drenica, Fahri Fazliu dhe rrugën Bedri Gjini. Po ashtu, për shkak të punimeve nga pala e tretë në NS 110/20kV Prishtina 7, nga ora 12:00 deri në 16:00, ndërprerje do të ketë në Veternik 7 dhe në objektet e Muharrem Fejzës (Relax 6). Në komunën e Skenderajt, siguria e sistemit kërkon ndërhyrje në NS 110/10(20)kV. Nga ora 10:00 deri në 11:00, pa rrymë do të jetë dalja 10kV Likovc, duke prekur fshatrat: Arbëri e Epërme, Arbëri e Poshtme, Likovc, Makërmal, Morinë, Plluzhinë, Pozhullë, Murg, Obri e Ulët, Obri e Epërme, Rrezallë, Shtuticë, Ticë, Tushil, si dhe një pjesë të qytetit. Për shkak të energjizimit të segmentit të ri të linjës 10kV Llaushë-Tushil, në disa lokacione tjera të këtij rajoni, ndërprerjet do të zgjasin deri në orën 16:00. Ndërkohë, në Mitrovicë, përmes NS 110/10kV Mitrovicë 2, do të bëhet stakimi i daljes 10kV Shipoli nga ora 10:30 deri në 15:15. Kjo ndërprerje do të afektojë një numër të madh rrugësh urbane, përfshirë rrugët si: Agim Çavdërbasha, Ali Hadri, Dëshmorët e Kombit, Eqrem Qabej, Pjetër Budi, Shkodra dhe të tjera. Gjithashtu, pa energji do të mbeten edhe fshatrat: Frashër i Vogël, Lushtë, Pirç, Shipol, Vaganicë, Vërnicë dhe një pjesë e Zhabarit të Epërm.