Kurti i shtron kusht PDK-së: Votoni Dhomat e Specializuara dhe presidenten në një seancë të vetme

Kryeministri në detyrë, Albin Kurti, ka ndërmarrë një iniciativë të re politike duke i kërkuar kreut të Partisë Demokratike të Kosovës (PDK), Bedri Hamza, që të marrë një zotim publik lidhur me zhbllokimin e proceseve institucionale në vend. Kurti ka kërkuar nga Hamza që të deklarohet hapur se i gjithë grupi parlamentar i PDK-së do të marrë pjesë në votimin për zgjedhjen e presidentes së vendit. Sipas kreut të ekzekutivit, kjo lëvizje do të ishte një hap vendimtar për stabilitetin e institucioneve të Kosovës. Në propozimin e tij, Kurti ka skicuar një format të ri për seancën e Kuvendit, e cila do të përmbante dy pika kryesore të rendit të ditës. Ai ka theksuar se fillimisht duhet të votohet projektligji për Dhomat e Specializuara, e më pas t’i hapet rrugë procesit të votimit për shefen e shtetit. “Le të dalë publikisht sonte, pas meje menjëherë, që të gjithë deputetët e grupit parlamentar të PDK-së zotohen bashkë se marrin pjesë me votë në zgjedhjen për presidente”, ka deklaruar Kurti, duke shtuar se votimi për Dhomat e Specializuara do të kryhet paraprakisht si shenjë e vullnetit për të ecur përpara. Duke detajuar agjendën e propozuar, Kurti sqaroi: “Ne po e votojmë projektligjin për Dhomat e Specializuara paraprakisht. Pra, jo më pas, përpara. Një seancë me dy pika: pika e parë, leximi i dytë i projektligjit mbi Dhomat e Specializuara e ka votën tonë. Dhe mandej votimi për presidente”. Në kuadër të këtyre diskutimeve, kryeministri në detyrë ka përmendur edhe emrin e Justina Shiroka-Pulës, kryetares së Akademisë së Shkencave dhe Arteve të Kosovës, e cila më herët ka shërbyer si ministre e PDK-së në Qeverinë Thaçi I.