Ultimatumi i Fitore Pacollit për opozitën: Keni edhe 120 minuta kohë për t'u rikthyer në Kuvend

Deputetja e Lëvizjes Vetëvendosje, Fitore Pacolli, i ka bërë thirrje publike opozitës përmes një postimi në rrjetet sociale, duke i dhënë asaj një afat prej dy orësh për të reflektuar dhe për t'iu bashkuar punimeve në Kuvendin e Kosovës. Ajo ka paralajmëruar se në rast të një refuzimi nga ana e partive opozitare, do të jetë i nevojshëm një angazhim për të arritur një fitore madhështore, si asnjëherë më parë. Sipas Pacollit, kjo kohë e mbetur duhet të shfrytëzohet nga opozita për t'u kthyer në sallën e Kuvendit, me qëllim që të votohet në lexim të dytë Projektligji për Dhomat e Specializuara, e më pas të procedohet edhe me zgjedhjen e Presidentit të vendit. Në fund të reagimit të saj, deputetja e mazhorancës ka theksuar se veprimet e mëtejshme do të varen nga ky afat, duke lënë të kuptohet se presioni politik mbetet i lartë mes pozitës dhe opozitës.