Zgjedhja e presidentit: Albin Kurti hedh në tavolinë një kandidaturë të re nga bota akademike

Kryeministri Albin Kurti ka ndryshuar sërish qasjen për çështjen e kreut të shtetit, duke dalë me një emër të freskët për postin e presidentit. Ky zhvillim vjen pas dështimit të mundësisë me profesorin Bekim Sejdiu dhe kundërshtimeve të forta nga kreu i Partisë Demokratike të Kosovës (PDK), Bedri Hamza, lidhur me rendin e votimit të Ligjit për Dhomat e Specializuara para zgjedhjes presidenciale. Kandidatura e re e prezantuar nga shefi i ekzekutivit është Justina Shiroka-Pula, e cila aktualisht mban pozitën e kryetares së Akademisë së Shkencave dhe Arteve të Kosovës (ASHAK), detyrë të cilën e mori në dhjetor të vitit 2025. Lëvizja e re pasoi ngërçin e krijuar pasi Hamza refuzoi skenarin që Projektligji për ndryshimin e Ligjit për Dhomat e Specializuara dhe votimi për presidentin të zhvilloheshin brenda të njëjtës seancë parlamentare. Kujtojmë se gjatë përpjekjeve të mëparshme, Kurti kishte nominuar Glauk Konjufcën dhe Feride Rushitin për këtë post, por këto propozime u hodhën poshtë nga Hamza, i cili i cilësoj ato si figura me prapavijë politike. Sipas liderit të PDK-së, synimi i kryeministrit ishte sigurimi i një presidenti politik për të kurorëzuar, siç e quajti ai, kapjen e institucioneve të vendit. Si kundërpërgjigje ndaj këtyre zhvillimeve, kreu i qeverisë ka kushtëzuar një marrëveshje të mundshme. Kurti ka bërë të ditur se në rast se 22 deputetët e PDK-së garantojnë pjesëmarrjen e tyre në seancën për zgjedhjen e presidentit, atëherë deputetët e shumicës parlamentare do të japin votën e tyre paraprake për Projektligjin e Dhomat e Specializuara. "Pastaj, votimi për presidente, Justina Shiroka Pula, kryetare e Akademisë së Shkencave, ish-ministre e PDK-së në Qeverinë Thaçi I", u shpreh Kurti duke zbuluar ofertën e tij të re. Justina Shiroka-Pula, e cila përveç drejtimit të ASHAK-ut mban edhe profilin e ish-ministres, është lakuar edhe më herët në korridoret e politikës si një opsion i mundshëm për kreun e shtetit.