Rrëfimi rrëqethës i xhudistit Indrit Çullhaj: Si garova me brinjë të krisur në Tokio dhe sakrificat për Los Angeles 2028

Indrit Çullhaj mbetet një prej personaliteteve më të spikatura të xhudove shqiptare, i cili ka lënë një shenjë të pashlyeshme në sportin e vendit, falë tetë medaljeve ballkanike (ku katër prej tyre janë të arta) dhe paraqitjes së tij në Lojërat Olimpike “Tokio 2020”. Së fundmi, xhudisti kuqezi është kurorëzuar sërish si kampion i Ballkanit, pas një ecurie të shkëlqyer me katër fitore rresht. Karriera e tij mbresëlënëse përfshin plot 19 tituj si kampion i Shqipërisë dhe një arkivë prej 137 medaljesh ndërkombëtare. I pranishëm në studio në emisionin “Rudina”, sportisti ndau me publikun sfidat e rrugëtimit të tij, triumfet, çmimin e lartë të sakrificave dhe ambicjen e qartë për të siguruar një tjetër biletë olimpike, kësaj radhe për në Lojërat e Los Angeles 2028. Duke sjellë në vëmendje një prej çasteve më kritike të karrierës së tij në tapet, Çullhaj zbuloi se kishte hyrë në garë me një dëmtim në brinjë të pësuar që në Tiranë, duke arritur të menaxhonte epërsinë në sekondat e fundit pavarësisht dhimbjes. “Ky është një moment shumë delikat për mua te kjo foto, sepse ka qenë një moment që unë e kisha krisur brinjën që në Tiranë dhe nuk e dija që e kisha vrarë. Aty i kam marrë pikët dhe kanë qenë 15 sekondat e fundit për të ruajtur fitoren dhe fitova. Në një moment më jep një therje të jashtëzakonshme te pjesa e brinjës dhe ulem, s’e kuptova nga erdhi. Në një moment e dëgjoj vëllain që thotë: Indrit, kemi punuar katër vite për të ardhur, çohu, mos rri shtrirë. Thashë me vete: A ta dish ti çfarë është dhimbja… Jo frymëmarrje që nuk merrja dot, por dhimbje të jashtëzakonshme. Shumë, shumë e jashtëzakonshme dhe më humbi veshja, si më thënë për diçka të vogël edhe kësaj radhe. Për Los Angeles dua të shkoj ta provoj veten siç duhet”, u shpreh ai. Përtej eksperiencës në “Tokio 2020”, xhudisti ka tashmë në fokus sfidën e radhës: Lojërat Olimpike “Los Angeles 2028”. Për atleti kuqezi, ky synim kërkon një cikël katërvjeçar me punë intensive, sakrifica dhe përkushtim maksimal. “Synimi është drejt Los Angeles 2028. Nuk ka asgjë të pamundur. Thjesht të kesh dëshirë dhe fokus për të shkuar atje. Është 4 vjet që të kapësh normën olimpike. Unë në Tokio e kam arritur gati për ta marrë atë, në Lojërat Olimpike të Tokios”, deklaroi Çullhaj.