Tensionohet situata: Prani e shtuar e forcave të rendit para Qeverisë dhe Kuvendit, a po shkon vendi drejt zgjedhjeve?

Përshkallëzim i situatës ka ndodhur gjatë orëve të fundit në kryeqytet, ku numri i qytetarëve të mbledhur në protestë para institucioneve ekzekutive dhe legjislative ka shënuar rritje të ndjeshme. Paralelisht me këtë, autoritetet kanë ndërmarrë masa shtesë sigurie duke blinduar perimetrin e këtyre objekteve. Përveç kordonit të zakonshëm të sigurisë të vendosur në hyrje të ndërtesave shtetërore, një numër i konsiderueshëm i automjeteve zyrtare dhe efektivëve shtesë të Policisë së Kosovës janë futur brenda oborrit të Qeverisë dhe Kuvendit për të mbajtur situatën nën kontroll. Kjo situatë e tensionuar vjen në një moment kritik politik, pasi ora 24:00 shënon edhe skadimin e afatit kushtetues për zgjedhjen e kreut të shtetit. Nëse ky proces dështon, vendi rrezikon të futet menjëherë në një cikël të ri zgjedhjesh të parakohshme parlamentare. Ndërkohë, protestuesit po kërkojnë me ngulm miratimin në lexim të dytë të ndryshimeve në Ligjin për Gjykatën Speciale. Megjithatë, situata është nyjëtuar pasi Lëvizja Vetëvendosje ka vendosur kusht që ky proces të jetë i lidhur ngushtë me sigurimin e votave për zgjedhjen e presidentit.